Ankara kóshesine Shyńǵys Aıtmatovtyń esimi berildi

ASTANA. QazAqparat - Qyrǵyzstan Prezıdenti Almazbek Atambaev Ankara mýnıtsıpalıteti tarapynan uıymdastyrylǵan Ankaranyń Batykent aýdanyndaǵy kóshege álemge áıgili qyrǵyz jazýshy Shyńǵys Aıtmatovtyń esiminiń berilýi jáne bıýstiniń ashylýy rásimine qatysty.

Qyrǵyz basshysy Sh.Aıtmatovtyń Túrkııada kóp oqylǵan qalamger ekenin, kóptegen qalalarda jazýshynyń atynyń saıabaqtarǵa, kóshelerge berilgenin aıtyp, alystaǵy Ankarada da jańǵyrýyna qýanyshty ekenin jetkizdi. Sondaı-aq ol Qyrǵyzstan men Túrkııanyń arasyndaǵy jaqyndyqtyń bolashaqta da jalǵasatynyn atap kórsetti. Rásimge qatysqan Túrkııa Premer-mınıstriniń orynbasary Emrýllah Ishler de Shyńǵys Aıtmatovtyń týyndylarynyń basym bóliginiń túrik tiline aýdarylǵanyn, olardyń Túrkııada kóp oqylatyn týyndylar qatarynda ekenin aıtty. Sonymen qatar Ankara mýnıtsıpalıtetiniń tóraǵasy Melıh Gókchek Aıtmatovtyń álem ádebıetine qundy úles qosqan mańyzdy qalamger ekenin atap kórsetti, dep habarlaıdy Ádebıet portaly.