Ankara, Baký jáne Astana dıasporalar yntymaqtastyǵyn keńeıtedi

ANKARA. QazAqparat - Túrkııa úkimetiniń janyndaǵy Sheteldegi otandastar jáne týys qaýymdar isteri basqarmasy (YTB) Ázerbaıjannyń Dıaspora máseleleri jónindegi memlekettik komıtetimen jáne Qazaqstan Azamattyq bastamalardy qoldaý qorymen yntymaqtastyq memorandýmyn jasasty, dep habarlaıdy QazAqparat «Anadoly» agenttigine silteme jasap.

YTB keńsesindegi sharaǵa onyń basshysy Abdýllah Eren, ıÝnýs Emre ınstıtýtynyń dırektory Sheref Atesh jáne sheteldik stýdentter men ǵylymı zertteýshilerge arnalǵan tegin memlekettik stıpendııa baǵdarlamasyna qatysýshy stýdentter qatysty.

Sharada Túrki keńesine múshe elder arasyndaǵy tarıhı-mádenı baılanystardyń tereńge jaıylǵan tamyry bolashaqta qarym-qatynastardy damytýǵa keń múmkindikter esigin ashatyny tilge tıek etildi. 

Abdýllah Erenniń aıtýynsha, 17 myńnan astam sheteldik stýdent Túrkııanyń úzdik ýnıversıtetterinde tegin bilim alyp jatyr.

Sharada Abdýllah Eren men Qazaqstan Azamattyq bastamalardy qoldaý qorynyń basshysy Nurtaı Ábiqaev «Memlekettik qurylymdar arasynda dıaspora salasyndaǵy yntymaqtastyq týraly memorandýmǵa» qol qoıdy. Sondaı-aq «Túrkııa jáne Ázerbaıjan memlekettik qurylymdary arasynda dıaspora salasyndaǵy yntymaqtastyq týraly memorandýmǵa» da qol qoıyldy.

Qujattar áleýmettik, mádenı jáne ekonomıkalyq damý barysynda dıasporalar jumysyna úles qosýǵa baǵyttalǵan. Budan tys, joǵaryda atalǵan vedomstvolar kemsitýshilik, ıslamofobııa jáne rasızm kórinisterine qarsy birge kúresedi.