Ankara ákimi Ystambuldaǵy mıtıngte Imamoǵlýǵa qoldaý kórsetti
ASTANA. KAZINFORM — Oppozıtsııalyq kózqarasymen tanymal Ankara ákimi Mansýr ıAvash Ystambuldaǵy mıtıngilerge narazylyq bildirýshilerge qoldaý kórsetý maqsatynda qosyldy, dep habarlaıdy Kazinform agenttiginiń menshikti tilshisi.
Imamoǵlý qamaýǵa alynǵannan keıin birden bastalǵan narazylyqtar Túrkııanyń basqa qalalaryna da jyldam tarady. Alǵashqy kúnderden bastap oppozıtsııalyq «Respýblıkalyq halyqtyq partııa» (RHP) tóraǵasy Ózgúr Ózel sherýlerge belsendi qatysyp keledi. Sonymen qatar, Ankara ákimi ıAvash ta RHP ıdeıalaryn qoldaıtynyn rastady.
Óziniń búkil saıası mansabynda reformalar men adam quqyqtaryn qorǵaýdyń jaqtaýshysy retinde tanylǵan ıAvash narazylyqtarǵa qatysý qazirgi Túrkııadaǵy saıası jaǵdaıda mańyzdy belgi ekenin málimdedi. Ol demokratııalyq qundylyqtardy, azamattardyń óz pikirin bildirý jáne beıbit narazylyqtarǵa qatysý quqyǵyn qoldaıtynyn erekshe atap ótti.
Bılik tarapynan 23 naýryzǵa deıin engizilgen shekteýlerge qaramastan, Ystambuldaǵy sherýler men aktsııalar jalǵasýda. 20-nan 21-naýryzǵa qaraǵan túni Túrkııanyń birneshe qalasynda qaıtadan narazylyqtar ótti. Ystambulda qala ákimdiginiń ǵımaraty mańyna kóptegen adamdar jınaldy.
Ankara ákimi áleýmettik jelide óziniń Ystambuldaǵy tarıhı Sarachhane aýdanynda, narazylyq aktsııalary ótip jatqan qala ákimdigi aldynda turǵanyn habarlady. Bul sherýler qamaýǵa alynǵan Ystambul meri Ekrem Imamoǵlýǵa qoldaý kórsetý maqsatynda uıymdastyrylǵan.
Buǵan deıin áriptesin qoldaıtynyn bildirgen Mansýr ıAvash Ystambulǵa bara jatqanyn, sondaı-aq RHP-nyń parlamenttik toby men demokratııa úshin kúresip jatqan barlyq merler men partııa múshelerin qoldaıtynyn málimdegen bolatyn.
Óziniń jazbasynda ol qamaýǵa alynǵan Imamoǵlýdy «bizdiń prezıdentimiz» dep atap, osylaısha oppozıtsııa kóshbasshysyna adaldyǵy men qoldaýyn aıqyn kórsetti.
Ystambul meri Ekrem Imamoǵlý 19 naýryz kúni jemqorlyq jáne paraqorlyqpen aınalysqan qylmystyq topty uıymdastyrdy degen aıyppen qamaýǵa alyndy. Memlekettik aıyptaý tarapy onyń jáne seriktesteriniń joǵary deńgeıdegi sybaılas jemqorlyq shemalaryna qatysy bolýy múmkin ekenin alǵa tartady. Tórt kúnge sozylatyn tergeý barysynda qala basshysy men onyń jaqtastary qamaýda bolady.
Buǵan deıin Túrkııa prezıdenti Rejep Taıyp Erdoǵan oppozıtsııany synap, olardy quqyq qorǵaý organdary men sot júıesine saıası qysym kórsetýge tyrysty dep aıyptaǵan bolatyn.
Erdoǵannyń aıtýynsha, oppozıtsııanyń ishki janjaldary men zańǵa qatysty máselelerin Túrkııadaǵy eń basty problema retinde kórsetý áreketteri – ekijúzdiliktiń sharyqtaý shegi.