Ankara 125 metr bıiktikten Qazaqstandy Táýelsizdik kúnimen quttyqtady
«Ǵımarat basshylyǵy Ankaranyń kez kelgen jerinen kórinetin, qyrda ornalasqan munara shyńynda Qazaqstan Respýblıkasyn Táýelsizdik kúnimen quttyqtady. Ǵımarat basshylyǵyna shyn júrekten alǵysymyzdy bildiremiz!», - dep jazdy Facebook-tegi paraqshasynda Qazaqstannyń Túrkııadaǵy elshisi Abzal Saparbekuly.
Paraqshada ornalastyrylǵan vıdeoda Atakúle nysany elimiz Týynyń túsine boıalyp, joǵarǵy jaǵynda túrik jáne aǵylshyn tilderinde «Qazaqstan Respýblıkasynyń Táýelsizdik kúnimen quttyqtaımyz!» sózderi júgirtpe jolda jazylǵan. Sondaı-aq jazýlardyń arasynan birge ornalastyrylǵan Qazaqstan men Túrkııa Respýblıkalarynyń Týlaryn kórýge bolady.
Atakúle munarasy Túrkııa astanasynda ornalasqan bıiktigi 125 metrlik tele- jáne sholý ǵımaraty. Munara qalanyń kez kelgen derlik jerinen kórinedi jáne onyń sholý alańynan Ankarany alaqandaǵydaı tamashalaýǵa bolady. Sondaı-aq nysanda aınalmaly meıramhana ornalasqan. Ol 360 gradýstyq bir aınalymdy 1,5 saǵatta jasaıdy. Túrkııanyń eń birinshi saýda úıleriniń biri de munaranyń tómengi jaǵynda ornalasqan.
Buǵan deıin habarlaǵanymyzdaı, Qazaqstan Táýelsizdiginiń 28 jyldyǵy Túrkııanyń birneshe qalasynda toılandy. Merekelik sharalar 11 jeltoqsanda Qazaqstannyń Túrkııadaǵy Elshiliginiń resmı qabyldaýymen bastaldy. Oǵan Nur-Sultan qalasy ákimdigi Memlekettik akademııalyq fılarmonııasynyń Qazaq orkestri men «Qorqyt ata» kóne aspaptar saz toby arnaıy keldi. 50-den astam qazaqstandyq ónerpaz Ankara, Nıde, Býrsa, Nıde, Sakarııa jáne Túrkııanyń eń tanymal týrıstik aımaǵy - Kappadokııada óner kórsetti jáne sońǵy kontsert búgin Ystanbul qalasynda ótti. Kontsertte Qazaqstannyń Túrkııadaǵy Tótenshe jáne ókiletti elshisi Abzal Saparbekuly Ystanbul merine qobyz ben qamshy syılady.
Búgin Qazaqstan Respýblıkasynyń Táýelsizdik kúnine arnalǵan merekelik kontsert ótti.
