Ańyzǵa aınalǵan Citroën 2CV elektromobıl retinde qaıta shyǵarylady
ASTANA. KAZINFORM – Frantsııanyń áıgili Citroën 2CV avtomobıli óndiristen alynǵanyna 40 jylǵa jýyq ýaqyt ótken soń elektrli nusqada qaıta oralady. Jańa model 13-18 qazan aralyǵynda ótetin Parıj avtosalonynda tanystyrylady, dep habarlaıdy Euronews.
1948 jyly alǵash shyǵarylǵan Citroën 2CV Frantsııa avtomobıl ónerkásibiniń sımvoldarynyń birine aınalǵan. Model 1990 jylǵa deıin óndirilip, barlyq nusqasyn qosqanda 5 mıllıonnan astam danasy satylǵan.
Jańa elektromobıl túpnusqa modeldiń erekshelikterin saqtaıdy. Atap aıtqanda, V pishindi kapot, tik ornalasqan aldyńǵy áınek jáne dóńgelek faralar jańa kóliktiń syrtqy kelbetinde de kórinis tapqan.
Óndirýshi avtomobıldiń qarapaıymdylyǵy men qoljetimdiligine basymdyq berip otyr. Aldyn ala málimet boıynsha, onyń baǵasy shamamen 15 myń eýro bolady.
Citroën kompanııasynyń bas dırektory Ksave Shardon jańa modeldi tanystyrý barysynda tarıhı kóliktiń ereksheligine toqtaldy.
– 2CV óziniń tehnıkalyq jabdyqtalýynyń arqasynda emes, adamdarǵa bergen múmkindikteriniń arqasynda ańyzǵa aınaldy. Búginde sol rýh qaıta oralyp otyr, – dedi Ksave Shardon.
Stellantis kontserni avtomobıldiń baǵasyn qoljetimdi deńgeıde saqtaý úshin salmaǵy bir tonnadan aspaıtyn shaǵyn elektromobıl jasaýdy josparlap otyr.
Kólik kúndelikti qala ishindegi saparlarǵa arnalǵan shaǵyn akkýmýlıatormen jabdyqtalady.
Ázirge jańa Citroën 2CV kontsept-kar retinde usynylyp otyr. Onyń serııalyq óndirisi 2028 jyldyń sońyna qaraı, alǵashqy modeldiń 80 jyldyǵyna oraı bastalýy múmkin.
Sondaı-aq avtomobıldiń júk tasymaldaýǵa arnalǵan fýrgon nusqasyn shyǵarý múmkindigi qarastyrylyp jatyr.
Frantsııada elektromobılderge suranys memlekettik qoldaý sharalarynyń arqasynda artyp keledi. Qyrkúıek aıynda elde tirkelgen jańa avtomobılderdiń 42 paıyzyn elektr qýatymen júretin kólikter quraǵan. Bul – rekordtyq kórsetkish.
Ásirese shaǵyn elektromobılder men memlekettik áleýmettik lızıng baǵdarlamasy arqyly satyp alynatyn kólikterge suranys joǵary. Ótken aıda osy sanatta shamamen 9 500 avtomobıl tirkelgen.
Qytaılyq avtomobıl óndirýshilermen báseke kúsheıgen tusta eýropalyq kompanııalar da baǵasy qoljetimdi elektrli modelderge basymdyq bere bastady.
Máselen, Parıj avtosalonynda Dacia kompanııasynyń jańartylǵan Spring jáne Volkswagen kontserniniń ID. Polo modelderi de nazarǵa usynylady.
Aıta keteıik, buǵan deıin Volkswagen 2025 jyldyń qorytyndysy boıynsha Tesla-ny basyp ozyp, Eýropadaǵy elektromobılder satylymynyń kóshbasshysy atanǵan bolatyn. Kompanııa bir jylda 274 278 elektrli kólik satyp, satylym kólemin 56 paıyzǵa arttyrdy.
