Anıme stılindegi altyn áshekeıler Qytaıda jańa trendke aınaldy
ASTANA. KAZINFORM – Qytaıda anıme keıipkerleri men pop-mádenıet beınelengen altyn áshekeılerge suranys artyp keledi, dep habarlaıdy Kyodo agenttigi.
«Týntszın» dep atalatyn mundaı aksessýarlar ásirese jas áıelder arasynda tanymal. Olar bul buıymdar úshin kádimgi altyn áshekeılerdiń baǵasynan birneshe ese artyq tóleýge daıyn.
Kóbine bul belgili keıipkerler beınesinde jasalǵan shaǵyn altyn salpynshaqtar, olar bilezikterge nemese syrǵalarǵa taǵylady. Satyp alýshylardy baǵaly metall ǵana emes, súıikti keıipkerlerine degen emotsııalyq jaqyndyq ta qyzyqtyrady.
«Týntszın» ataýy qytaı tilindegi «tszın» («altyn») sózi men «týn» slengtik sózinen quralǵan. «Týn» aınaladaǵylarǵa oǵash nemese shamadan tys kórinýi múmkin jankúıerlik áýestikterdi sıpattaý úshin qoldanylady.
Jańa trend qytaılardyń altyndy ál-aýqattyń sımvoly retinde qadirleý dástúri men japon anıme mádenıetiniń tanymaldyǵyn biriktirdi.
Іri zergerlik jeliler qazirdiń ózinde resmı lıtsenzııalanǵan toptamalardy shyǵara bastady. Máselen, Gýanchjoýdaǵy saýda ortalyqtarynda Hello Kitty beınelengen altyn bilezikter satylyp jatyr. Quramynda shamamen 0,5 gramm taza altyn bar mundaı áshekeıdiń baǵasy 2370 ıýanǵa nemese shamamen 350 AQSh dollaryna teń.
Sondaı-aq Chiikawa franshızasy negizinde jasalǵan buıymdar da úlken suranysqa ıe. Aı kúntizbesi boıynsha Jańa jyl merekesi qarsańynda keıbir úlgiler satyp alýshylardyń kóptiginen tolyq satylyp ketken.
Bul trendtiń jankúıerleri mundaı áshekeıler kúızelisti jeńildetýge jáne kóńil kúıdi kóterýge kómektesetinin aıtady.
«Týntszınniń» tanymaldyǵy jalǵan ónimder naryǵynyń da ósýine áser etti. Eldegi eń iri altyn bazarlarynyń biri sanalatyn Shýıbeıde japon franshızalarynyń keıipkerleri beınelengen áshekeıler satylyp jatyr. Olardyń qatarynda «Kreıon Sın-tıan» men «Ýltramen» keıipkerleri de bar.
Satýshylardyń aıtýynsha, mundaı buıymdardyń kóbi avtorlyq quqyq ıeleriniń lıtsenzııasynsyz óndiriledi.
Aıta keteıik, buǵan deıin Qazaqstanda bir gramm altynnyń quny shamamen qansha teńge ekeni habarlanǵan.
