Anımatsııa salasy qarqyndy damý ústinde - Ermek Amanshaev

Ótken jyly elimizde prokatqa 220 fılm shyqty, onyń 10 paıyzyn anımatsııalyq fılmder quraıdy. Bul týraly búgin Almatyda I qazaqstandyq «Er Tóstik» anımatsııalyq fılmder festıvaliniń ashylýyna arnalǵan baspasóz máslıhatynda Sháken Aımanov atyndaǵy «Qazaqfılm» AQ-nyń prezıdenti Ermek Amanshaev málim etti.

Onyń aıtýynsha, elimizde 1960-80 jyldary jylyna 4 mýltfılm túsirilip otyrsa, el táýelsizdigin alǵan 1991 jyldan 2001 jylǵa deıin birde - bir anımatsııalyq fılmder túsirilmegen. «Anımatsııalyq fılmderdiń ósý qarqyny 2001 jyldan bastaldy, sol jyldan bastap qolǵa alyna bastady desem bolady. Qazir biz jylyna 4-5 móltek fılmderdi shyǵarýdamyz. Ótken jyly 7-8 qysqa metrajdy mýltfılmderdi shyǵaryp, óndiriske «Er Tóstik» pen «Samruq qus» atty eki tolyqmetrajdy mýltfılmderdi jiberdik. Balaǵa oı salatyn, tálimdik-tárbıelik mýltfılmderdi jasaýda biz sanymen qatar, sapasyna da úlken mán beremiz»,-dedi E. Amanshaev.

Onyń aıtýynsha, anımatsııa salasynyń joǵary deńgeıde damýy úshin bir-eki jyl emes, birneshe jyldar qajet. «Búginde bizde kınoteatrlardyń kóbeıip jatqandyǵy qatty qýantady. 2009 jyly elimizde 77 kınoteatr ǵana bolsa, 2010 jyly onyń sany 196-ǵa jetti. Al, bılet satylymy búginde 20 mıllıonǵa jetip otyr. Sondyqtan biz jaqsy fılmder jasaı berýimiz kerek. Kıno týyndylar men anımatsııalyq fılmderdi jasaý úshin biz de barlyq jaǵdaılar, mamandar, tehnıkalar bar, qarjy da jetkilikti, degenmen ónimderimiz básekege qabiletti bolýy úshin memlekettiń de qoldaýy úlken qajet»,-dedi Ermek Amanshaev.

Onyń aıtýynsha, qazirgi ýaqytta Qazaqstanda 10-ǵa tarta kınostýdııalar jumys jasaıdy.