Angolada salmaǵy 131 karat almaz tabyldy
LÝANDA. Sınhýa-QazAqparat – Angolanyń Soltústik Lýnda provıntsııasyndaǵy almaz qorymen áıgili Lýlo kenishinen IIa tıpti aq almaz tabyldy. Bul týraly búgin Endiama memlekettik gaýhar kompanııasy málim etti, dep habarlaıdy QazAqparat Sınhýa agenttigine silteme jasap.
Kompanııada baǵaly tasty avstralııalyq Lucapa Diamond kompanııasy men onyń seriktesteri Lýlo kenishiniń 19-shy blogynda tapqanyn atap ótti. 11 kún buryn sol shahtadan 160 karattyq almaz tasy tabylǵan edi. Bul – jyl basynan beri munda tabylǵan salmaǵy 100 karattan asatyn tórtinshi jáne barlyq tabylǵan gaýhar tastardyń ishinde 29-shy almaz.
Angola astanasy Lýandadan shyǵysqa qaraı shamamen 630 km jerde ornalasqan Lýlo almaz kenishi kólemi jaǵynan álemde tórtinshi orynda. Bul – Lucapa Diamond 40%, Endiama 32% jáne Rosas & Petalas jeke Angola kompanııasy 28% aktsııaǵa ıe birlesken kásiporyn.
Sońǵy onjyldyqta júrgizilgen jumystar Lýlo kenishiniń álemdegi eń baı allıývıaldy almaz ken oryndarynyń biri ekenin dáleldedi.
Endiama málimetinshe, 2016 jyly Lýlo kenishinen tabylǵan eń úlken 404,2 karattyq almaz tasy 16 mln dollarǵa (bir karat úshin 39 580 dollar) satyldy. Bul rekordtyq baǵa boldy. Almaz kesilip, zergerlik buıymdarǵa aınalǵannan keıin ony satýdan túsken paıda 34 mln dollarǵa jetti.
Angolanyń mıneraldyq resýrstar, munaı jáne gaz mınıstri Dıamantıný Azevedý Angola almaz óndirýdegi óziniń «zor» áleýetin osymen taǵy bir tanytqanyn aıtty.
«Mundaı oljalardyń arqasynda jaqyn bolashaqta álemdegi eń iri almaz óndirýshilerdiń birine aınala alatynymyzǵa tolyq senimdimin», - dedi mınıstr.
Foto: images.nrc.nl
