Angolada 500-den astam adamnyń súıegi jatqan qorym tabyldy
ASTANA. KAZINFORM – Angolanyń Lýanda qalasynda 1977 jylǵy 27 mamyr oqıǵalary kezinde qaza tapqan 500-den astam adamnyń súıegi jatqan baýyrlastar zıraty tabyldy, dep habarlaıdy Noticia Sao Minuto basylymy.
Jappaı jerleý orny Angola tarıhyndaǵy eń qasiretti kezeńderdiń birine qatysty tergeý barysynda №14 zırat aýmaǵynan anyqtalǵan.
Ádilet jáne adam quqyqtary mınıstri Marsı Lopesniń aıtýynsha, qorymnyń orny bes jyl boıy arnaıy tehnologııalyq jabdyqtardyń kómegimen izdestirilgen. Tabylǵan súıekter qurbandardyń jeke basyn anyqtaý jáne týystaryna jaqyndaryn tanýǵa kómektesý úshin zerthanalyq saraptamaǵa jiberiledi.
Lýandadaǵy Ortalyq krımınalıstıka bóliminde jáne eldiń ózge provıntsııalarynda týystarynyń DNQ úlgilerin tapsyrýyna múmkindik beretin arnaıy tizim jarııalanady.
Іzdeý jumystarymen 2019 jyly qurylǵan Saıası qaqtyǵystar qurbandaryn eske alý jáne tatýlasý josparyn iske asyrý komıssııasy (CIVICOP) aınalysyp keledi. 2021 jyldan beri eldiń segiz provıntsııasynda 316 qurbannyń súıegi eksgýmatsııalanyp, 3 200-den astam ólim týraly kýálik berilgen. Sonymen qatar shamamen 500 otbasy jaqyndaryn áli de izdep júr.
1977 jylǵy 27 mamyrdaǵy oqıǵalar prezıdent Agostıno Netoge qarsy memlekettik tóńkeris jasaý áreketinen bastalǵan. Kóterilis Kýba áskeriniń qoldaýymen kúshpen basyp-janshylǵannan keıin bıleýshi partııa múshelerine qarsy jappaı tutqyndaýlar men ólim jazalary júrgizilgen.
Oqıǵa qurbandarynyń naqty sany áli kúnge deıin anyqtalmaǵan. Ártúrli derekter boıynsha, qaza tapqandar sany birneshe myń adamǵa jetýi múmkin.
Aıta keteıik, byltyr qaraǵandylyq arheologter saq jaýyngeri jerlengen qorymdy tapty.
