Anglııanyń Joǵary soty Statıge qarsy iste Qazaqstan tarapynyń paıdasyna sheshim shyǵardy
NUR-SULTAN. QazAqparat - Anglııanyń Joǵary soty Qazaqstan Respýblıkasy Ulttyq Bankiniń jáne Qazaqstan Respýblıkasynyń Ádilet mınıstrligi atynan Qazaqstan Respýblıkasynyń qatysýymen sot isi boıynsha sheshim shyǵardy, dep habarlaıdy QR ulttyq bankiniń baspasóz qyzmeti.
Jaýap berýshi retinde Nıý-Iork Banki Mellon (BNYM), Anatol men Gabrıel Statı jáne olarmen baılanysty kompanııalar boldy.
Bul Anglııanyń Joǵary sotynyń tarıhynda Qazaqstan tarapynyń bastamasymen jáne kúsh-jigerimen koronavırýstyń jahandyq pandemııasyna baılanysty qashyqtan ótken birinshi protsess boldy. Zańgerler, sarapshylar men kýágerler Ulybrıtanııada, Qazaqstanda, Belgııada jáne AQSh-ta bola tura, otyrystarǵa qatysty.
Sot talqylaýy 2018 jylǵy mamyrdan bastap jalǵasyp keledi. Anglııanyń Joǵary sotyndaǵy protseske qatysý úshin Ulttyq Bank Stewarts jáne 3 Verulam Buildings sııaqty belgili zań fırmalaryn tartty. Sotta isti qaraý barysynda Ulttyq Bank Statı dálelderiniń negizsizdigin jáne kastodıan retinde BNYM-de Ulttyq qordyń aktıvterine qatysty Ulttyq Bank aldynda ǵana mindettemeleri bar ekendigin dáleldedi.
Bul sheshim Statıdiń tórelik sheshimdi Qazaqstan Respýblıkasyna qarsy oryndaýǵa ákelý áreketterine baılanysty uzaqqa sozylǵan sot talqylaýlary tizbegindegi mańyzdy bólik bolyp tabylady.
Buryn aǵylshyn soty qolda bar dálelderge súıene otyryp, osy tórelik sheshimdi alý kezinde Statı tarapynan alaıaqtyq belgilerin anyqtady. Osyǵan qaramastan, 2017 jylǵy qazanda Statı Belgııadaǵy Qazaqstan Respýblıkasy Ulttyq qorynyń 22 mıllıard AQSh dollarynan astam mólsherdegi aktıvterine sot tarapynan tyıym salýǵa qol jetkizdi. Ulttyq Banktiń qatysýymen budan bylaıǵy sot talqylaýy barysynda aktıvterdiń kóp bóliginen (BNYM kastodıandyq saqtaýdaǵy 530 mıllıon dollardy qospaǵanda) tyıym salý alyp tastaldy. Belgııa soty Ulttyq qordyń aktıvterin kastodıandyq saqtaýǵa baılanysty ózara qarym-qatynastardyń sıpaty týraly máseleni de Anglııa sotyna qaıta jiberdi.
Anglııa Joǵary sotynyń sheshimi Ulttyq qordyń aktıvteri tyıym salýǵa jatpaıtynyn, sol sebepti, Ulttyq Bank Belgııa sottarynda Qazaqstan Respýblıkasy Ulttyq qorynyń aktıvterinen tyıym salýdy birjolata aldyrýǵa quqyly ekendigin bildiredi.
