Anglııanyń Ulttyq densaýlyq saqtaý qyzmeti jumysyn toqtatty
ASTANA. KAZINFORM – Brıtanııa úkimeti Anglııada 15 myńnan astam adam jumys isteıtin Ulttyq densaýlyq saqtaý qyzmetiniń taratylǵanyn habarlady.
Ulybrıtanııa premer-mınıstri Kır Starmerdiń atap ótýinshe, densaýlyq saqtaý júıesiniń qazirgi qurylymy tıimsiz. Osyǵan baılanysty úkimet únemdelgen qarajatty medıtsınalyq qyzmetterdiń sapasyn jaqsartý úshin paıdalana otyryp, Anglııadaǵy Ulttyq densaýlyq saqtaý qyzmetin taratady.
- Men brıtandyqtardyń óz aqshalaryn bıýrokratııanyń eki deńgeıine jumsaý qajettigin aqtaı almaımyn. Bul qarajat medbıkelerge, dárigerlerge, operatsııalarǵa jáne dárigerdiń qabyldaýyna jumsalýy múmkin jáne jumsalýy kerek, - dep málimdedi Starmer beısenbide.
Úkimet basshysynyń pikirinshe, Anglııanyń Ulttyq densaýlyq saqtaý qyzmeti men Ulybrıtanııanyń densaýlyq saqtaý departamentiniń bir mezgilde bolýy júıeniń shamadan tys kúrdeliligine ákeledi. Bul qurylymdardy biriktirý basqarýdy ońtaılandyrýǵa, qatar protsesterdi joıýǵa jáne jyl saıyn júzdegen mıllıon fýnt únemdeýge múmkindik beredi.
Ulybrıtanııanyń Ulttyq densaýlyq saqtaý júıesi Anglııa, Shotlandııa, Ýels jáne Soltústik Irlandııa tórt aımaqtyq júıesin biriktiredi. Anglııanyń densaýlyq saqtaý júıesi 2012 jyly úkimetten keń avtonomııaǵa ıe kvazımemlekettik organ retinde quryldy.
Ol Anglııadaǵy densaýlyq saqtaý qyzmetterin qarjylandyrý men úılestirýge jaýapty. Ol 1,4 mln aýrýhana, dáriger jáne jedel járdem qyzmetkerlerin jáne 190 mlrd fýnt sterlıngten astam bıýdjetti qadaǵalaıdy.
Osyǵan deıin Anglııadaǵy naýqastardyń kópshiligi ctomatologtiń kómegine júgine almaı qınalyp júrgeni týraly jazdyq. Ulttyq densaýlyq saqtaý qyzmeti olardy memlekettik joldamamen qamtamasyz ete almaı keledi.