Anglııanyń densaýlyq saqtaý qyzmetinen úlken olqylyqtar anyqtaldy
ASTANA. KAZINFORM - Ulybrıtanııanyń Ulttyq densaýlyq saqtaý qyzmetiniń jaǵdaıy syn kótermeıdi. Táýelsiz zertteýdiń nátıjesi osyndaı. Dárigerdiń qabyldaýyn kútken naýqastardyń sany rekordtyq deńgeıge jetken. Lıberaldy demokrattar salaǵa qarjy quıý kerek dese, bılik partııasyndaǵylar reforma qajet dep otyr, dep habarlaıdy Kazinform tilshisi.
Áleýmettik jelilerde úıdegi baqylaý kamerasymen túsirilgen kadrlar jarııa etildi. Beıneden ózin nashar sezingen adamnyń jubaıymen birge jedel járdem qyzmetin shaqyryp jatqanyn kórýge bolady. Bir jarym saǵat ýaqyttan keıin ǵana medıtsına qyzmetkerleri kelip, naýqasty aýrýhanaǵa jetkizgen. Biraq, ókinishke qaraı, 59 jastaǵy er adamdy júrek talmasynan qutqarý múmkin bolmady.
“Men jaqyn adamymnyń óz ómiri úshin kúresýge múmkindigi bolmaǵanyna ashýlymyn. Dárigerlerdiń oǵan qol ushyn soza almaǵanyna nalımyn. Men joldasymdy qatty saǵyndym. Ulttyq densaýlyq saqtaý qyzmetine degen ókpem qara qazandaı,” - deıdi marqumnyń joldasy Leslı Martın.
Anglııada júrek aýrýymen aýyratyn naýqastarǵa jedel járdem qyzmeti ortasha eseppen 18 mınýtta jetýi kerek, biraq bul meje kóbine 40 mınýtta, ıaǵnı 2 eseden kóp ýaqytta oryndalyp júr. Nátıjesinde jyl saıyn myńdaǵan adam baqılyq bolýda. Budan bólek, ulttyq densaýlyq saqtaý qyzmetiniń basqa da soraqy tustary málim boldy.
“Qarjylandyrýdyń jetispeýshiligine baılanysty psıhıkalyq aýytqýlary bar naýqastar Vıktorııa dáýirindegi parazıtterge toly kameralarǵa ornalastyrylǵan. 17 er adamǵa tek 2 shomylý bólmesi qarastyrylǵan. Adam ómiri úshin asa mańyzdy qaterli isiktiń erte dıagnostıkasyn jetildirýge baǵyttalǵan jumystarda ilgerileý joq,” - deıdi hırýrg-keńesshi Ara Darzı.
Ara Darzı parlamenttiń lordtar palatasynyń otyrystaryna qatysatyn dáriger. Oǵan úkimet Ulttyq densaýlyq saqtaý qyzmetiniń jaǵdaıyn zertteýdi tapsyrǵan. Onyń esebi bul salanyń kemshin tustaryn tizbeleýge ǵana baǵyttalmaǵan. Kez-kelgen bilikti dárigerge tán qasıet, ol dıagnoz qoıyp qana qoımaı, emdeý josparyn da usyndy.
“Qarjynyń jetimsizdigi densaýlyq saqtaý qyzmetindegi ónimdiliktiń tómendeýine tikeleı áser etedi. Bárine mamandardyń jetispeýshiligi sebep dep oılaýǵa daǵdylanǵanbyz. Olaı emes. Zertteýge sáıkes dárigerler sanynyń kóbeıgeni anyq ańǵarylady, biraq ónimdilik tómen. Salaǵa ınvestıtsııa quıý arqyly ǵana tıimdilikti arttyrýǵa bolady,” - deıdi hırýrg-keńesshi Ara Darzı.
Lıberaldy demokrattar da qarjylandyrýdy kóbeıtýge shaqyrady. Olar terapevt qyzmetiniń aýqymy keńeıip, naýqas 7 kúnniń ishinde, al shuǵyl qajet bolǵan jaǵdaıda 24 saǵattyń ishinde qabyldanýy kerek dep sanaıdy. Derekterge sáıkes, basy aýyryp, baltyry syzdaǵandar dárigerge qaralý úshin 4 apta nemese odan da kóp ýaqyt kútýge májbúr bolyp júr.
“Jyl saıyn derlik úkimetter taǵy bir qystan aman shyǵý úshin densaýlyq saqtaý qyzmetiniń jyrtyǵyn jamaýǵa júzdegen mıllıon fýnt qarajat jumsap júr. Onyń ornyna salaǵa birjola ınvestıtsııa quıǵan tıimdirek bolar edi,” - deıdi lıberal-demokrattar partııasynyń kóshbasshysy Ed Deıvı.
Bılik partııasynyń kóshbasshysy, kerisinshe, qosymsha qarjylandyrýdan góri salany reformalaý qajettigin atap ótip, densaýlyq saqtaý qyzmetin jaqsartýdyń 10 jyldyq josparyn usyndy. Ol tis jegisiniń aldyn-alyp, temeki shegýdi toqtatyp, semizdikti boldyrmaý úshin profılaktıkalyq sharalardy qolǵa alý kerek deıdi. Starmer shirigen tisterin julyp tastaý úshin qanshama balanyń aýrýhanaǵa jatqyzylǵanyn bilgende qatty tań qalǵanyn jasyrmady.
“Esepte aıtylǵandaı, densaýlyq saqtaý qyzmeti óte múshkil jaǵdaıda bolýy múmkin, biraq onyń mańyzdy kórsetkishteri joǵary deńgeıde jáne biz uzaqmerzimdi reformany júzege asyrý úshin batyl qadam jasaýymyz kerek. Sala kúrdeli operatsııany qajet etedi. Biz qıyndyqtarǵa qarsy tura alamyz,” - deıdi Ulybrıtanııanyń premer-mınıstri Kır Starmer.
Burynǵy úkimet jıilep ketken dárigerlerdiń ereýilderin syltaý etip, terapevtiń qabyldaýyn kútkenderdiń kezegin qysqarta almady. Biraq Starmer saılaýda jeńgennen keıin aq halattylardyń jalaqysyn kóterip, kelisimderge qol jetkizdi. Biraq qazir bıýdjette aqsha joq. Tipti, 22 mıllıard fýnt kóleminde tapshylyq seziledi. Sondyqtan densaýlyq saqtaý qyzmetine aqsha quıylyp, salanyń múshkil hali jaqsara ketedi dep aıtý qıyn.
