Anglııaǵa jumysqa ornalastyrýdy ýáde etken bloger 92 adamnyń aqshasyn jymqyrǵan
ASTANA. KAZINFORM — Kókshetaý turǵyny qazaqstandyqtarǵa shetelge jumysqa ornalastyrýǵa ýáde berip, 92 adamnyń aqshasyn ıemdengen. Osy is boıynsha ol sot aldynda jaýap berdi, dep habarlaıdy Kazinform agenttiginiń tilshisi.
Kókshetaý qalalyq sotynyń málimetinshe, Kókshetaý turǵynyna qatysty QR Qylmystyq kodeksiniń 190-baby 4-bóliginiń 2-tarmaǵy boıynsha aqparattyq júıe men ınternet jelisin paıdalanýshylardy aldaý jáne olardyń senimin teris paıdalaný arqyly asa iri mólsherde alaıaqtyq jasaǵany úshin qylmystyq is qaralǵan.
— 2024 jyldan bastap Kókshetaý qalasynyń turǵyny, jeke kásipker B. azamattarǵa shetelde jumys isteýge qajetti qujattardy rásimdeý qyzmetin kórsetken. Áleýmettik jelide ózin bloger retinde tanystyryp, kórsetetin qyzmetteri týraly aqparat jarııalaǵan. Azamattardy aldap, olarmen shetelge jumysqa ornalastyrý týraly kelisimsharttar jasaǵan, vıza men medıtsınalyq saqtandyrýdy rásimdegen, Anglııaǵa ushý ýaqytyn talqylaǵan jáne qyzmeti úshin aqsha alǵan. Alaıda ol qujattardy jalǵan rásimdegeni úshin ár klıentten 250 myńnan 1 mln teńgege deıin aqsha alyp, keıin óz mindettemelerin oryndamaǵan. Jaýapkershilikten jaltaryp, kezdesýden qashqan jáne telefon qońyraýlaryna jaýap bermeı qoıǵan, — dep habarlady sottan.
Osylaısha áıel Kókshetaý, Astana, Qaraǵandy qalalarynan jáne Aqmola, Qaraǵandy, Qostanaı, Soltústik Qazaqstan, Qyzylorda oblystarynan 92 adamnyń jalpy somasy shamamen 70 mln teńge bolatyn aqshasyn ıemdengen.
Sot jaza taǵaıyndaý kezinde sottalýshynyń kámeletke tolmaǵan balalary bar ekenin jeńildetetin mán-jaı retinde eskerdi.
Sot úkimimen áıel 6 jyl 8 aıǵa bas bostandyǵynan aıyryldy. Sonymen qatar oǵan azamattardyń qarajatyn kommertsııalyq jáne ózge de qyzmetke tartýǵa baılanysty qyzmetpen aınalysýǵa 5 jylǵa tyıym salyndy.
QR Qylmystyq kodeksiniń 74-babynyń 1-bóligine sáıkes, asyraýynda eki kámeletke tolmaǵan balasy bolýyna baılanysty sottalǵan áıeldiń bas bostandyǵynan aıyrý jazasyn óteýi bir jylǵa keıinge qaldyryldy.
— Sotqa 28 jábirlenýshi bergen azamattyq talap aryzdar qanaǵattandyryldy. Jábirlenýshilerdiń árqaısysyna keltirilgen materıaldyq shyǵyn 200 myń teńgeden 1 mln teńgeden astam somaǵa deıin óndirildi, — dep qorytyndylady vedomstvo.
Sot úkimi zańdy kúshine engen joq.
Buǵan deıin Astanada jıhaz daıyndaýǵa tapsyrys qabyldaǵan eki alaıaq 19 adamdy aldaǵanyn jazǵanbyz.
