Anglııadaǵy qandastarymyz qazaq tilin onlaın úırenip júr

LONDON. QazAQPARAT - Ulybrıtanııada turyp jatqan qandastarymyz qazaq tilin onlaın úrenip júr. Kýrstyń uıymdastyrýshysy — «Otandastar» qory. Qatysýshylary qym-qýyt zamanda taǵdyrdyń tálkegine ushyrap, Qazaqstannan kóship ketken qara kózderimiz. Kýrs tek tildi ǵana emes, ulttyq salt-dástúrlerimizdi jáne mádenıetimizdi umyttyrmaýǵa baǵyttalǵan. Qatysýshylardyń jalpy sany 60-qa jýyq, dep habarlaıdy QazAqparat tilshisi.

«Dúnıejúzi boıynsha barlyq qazaqtardy qamtyp otyrǵan kýrs. Qazirgi tańda Anglııadan, Mońǵolııadan, Ózbekstannan, Ázerbaıjannan, kóbine Túrkııadan qatysyp júrgen til úırenýshilerimiz bar», deıdi tálimger Lázzat Bısenbaeva.

Kýrs tyńdaýshylarynyń biri brıtanııalyq qazaqtardyń basyn biriktiretin qaýymdastyq tóraǵasy Ábdisálim Savash. Onyń áke-sheshesi zulmat jyldary Altaı óńirlerinen Túrkııaǵa kóship ketken. Al ózi 25 jasynda Túrkııadan Ulybrıtanııaǵa qonys aýdarǵan. Alpysty alqymdaǵan aqsaqaldyń 5 balasy bar. Búgin jubaıy jáne qudaǵaıymen birge umytqanyn jańǵyrtyp, til úırenip jatyr.

«Bizdiń qazaqshamyz áke-sheshemizden estip-úırengen shala qazaqsha. Qazir ana tilimizdi meńgerip, damytyp jatyrmyz, qudaıǵa shúkir. Endi myna koronavırýs bitse, demalys kúnderi jastardy jınap, ınternet arqyly baılanysyp, qaýymdastyǵymyz úshin úıimnen bólingen bólmede tildi úırenýge tyrysamyz», deıdi Ábdisálim aqsaqal.

Bólmede Qazaqstannyń týynan bastap, ulttyq kıimderge deıin bar. Ulttyq aspapta oınap, salt-dástúrlerdi jańǵyrtýǵa da barlyq jaǵdaı jasalǵan. Birinshi jáne ekinshi jalpyulttyq lokdaýndar kezinde Ulybrıtanııadaǵy qandastarymyzdyń jáne elde ýaqytsha turyp jatqan otandastarymyzdyń basyn qosý múmkin bolmaǵan. Shekteýlerdiń jeńildetilýine baılanysty olardyń keıbirin dastarhan basynda jınaýdyń búgin sáti túsip otyr.

«Arys qalasynyń týmasymyn. Londonda 2010-jyldan beri jubaıymyz ekeýmiz turamyz. Osynda munaı-gaz salasynda jumys isteımin. Ózimiz endi syrtta júrgennen keıin ana tilimizde sóılesýge adam tappaı qalamyz keıde. Negizi, jumys aǵylshyn tilinde júrgizilgennen keıin qazaqsha sóılespeseń de umyta bastaısyń tildi», deıdi London qazaǵy, ınjener Dáýlet Esenalıev.

Ulybrıtanııa qazaqtary qaýymdastyǵynyń músheleri aldaǵy ýaqytta dombyra tartýdy da onlaın úırenýdi kózdep otyr. Osylaısha elden jyraqta júrgen qandastarymyzdyń ulttyq dúnıetanym sheńberi keńeıe túsedi degen zor senim bar.