Anglııadaǵy poıyzda jasalǵan shabýyl: jaralanǵan temirjolshynyń jaǵdaıy aýyr

ASTANA. KAZINFORM — Ulybrıtanııada 1 qarasha kúni keshkisin Donkasterden Londonǵa baǵyt alǵan poıyzda bolǵan jappaı pyshaqpen shabýyl jasaý oqıǵasyna qatysty tergeý jalǵasyp jatyr, dep habarlaıdy Sky News.

Oqıǵa London North Eastern Railway (LNER) kompanııasynyń sapary kezinde bolǵan. Jol ústinde jolaýshy vagonda otyrǵan adamdarǵa pyshaqpen shabýyl jasaǵan. Birneshe adam aýyr jaraqat alǵan. Jolaýshylardy qorǵaýǵa aralasqan temirjol qyzmetkeri de aýyr jaralandy.

Ulybrıtanııanyń kólik mınıstri Haıdı Aleksander jaralanǵan qyzmetkerdiń jaǵdaıy aýyr, biraq turaqty ekenin málimdedi.

«Ol sol kúni tańerteń osy poıyzdaǵy jolaýshylarǵa qyzmet kórsetý úshin jumysqa shyqty jáne ózin qaýipke tikti. Ol jumysqa kelip qana qoımaı, qaharmandyq tanytty. Ol óziniń batyl áreketimen búgin ortamyzda birneshe adamnyń tiri júrýine sebepker boldy», — dedi mınıstr.

Kólik polıtsııasynyń málimetinshe, qylmystyq oqıǵaǵa qatysy bar delingen eki kúdikti ustalǵan. Olardyń biri — 32 jastaǵy Pıterboro turǵyny, ol kisi óltirýge oqtaldy degen kúdikpen qamaýǵa alyndy. Ekinshisi aıypsyz bosatylǵan.

Tergeýshiler bul oqıǵany terakt retinde qarastyrmaı otyr, biraq barlyq nusqany tekserip jatyr, sonyń ishinde shabýyl jasaǵan adamnyń psıhıkalyq jaǵdaıy da qaralýy múmkin. Oqıǵadan keıin temirjol baǵyttaryndaǵy qaýipsizdik sharalary kúsheıtildi. Bılik batyrlyq kórsetken qyzmetkerge alǵys bildirdi.

Buǵan deıin kýágerlerdiń biri 8 jaralanǵan adamdy kórgenin aıtqan, al taǵy bir kýáger jaralanǵandardyń sany 12 adamǵa deıin jetýi múmkin ekenin habarlaǵan.

Ulybrıtanııa premer-mınıstri Kır Starmer de oqıǵaǵa qatysty málimdeme jasady.

Eske sala ketsek, Anglııada poıyzda belgisiz bireý adamdarǵa pyshaqpen shabýyldap, 10 adam jaraqat alǵan edi.