Anglııada turatyn qazaq pen shirkeý ókili: Qazaqstandy álemge úlgi etý kerek

LONDON, QazAqparat – Álemdik jáne dástúrli dinder lıderleriniń VII sezine búkil álemniń nazarynda. Ulybrıtanııadaǵy din ókilderi de, sol jaqta turyp jatqan qandastarymyz da rýhanı kóshbasshylardyń basqosýyn aqparat kózderinen qadaǵalap otyr, dep habarlaıdy QazAqparat tilshisi.

Aýqymdy shara týraly pikir bildirgenderdiń biri – Rıchard Ýılıam Braıant Atkınson. Ol Bedfordshır jáne Lıýton okrýgterindegi Anglıkan shirkeýin basqarady. Hrıstıan dininiń ókili elimizge birneshe ret kelip, sezderge belsene qatysty. Ol bıylǵy basqosýdyń da beıbitshilikti saqtaýǵa jáne órkenıetaralyq dıalogty nyǵaıtýǵa qosatyn úlesi erekshe deıdi.

«Qazaqstanǵa barǵan sońǵy toǵyz jylymda meni tań qaldyrǵan bir nárse bar. Ol – ártúrli etnıkalyq toptardyń birge turyp, tutas bir halyqqa aınalyp otyrǵandyǵy. Bul ózge elder úshin óte mańyzdy messedj. Osyndaı tájirıbeni taldaı otyryp, bizdiń bir-birimizden úırenerimiz kóp dep esepteımin. Kelisim men dostyqty tý etken 140 etnos ókili men 46 dinı qaýymdastyǵy bar Qazaqstandy ózge memleketterge úlgi etý kerek», - deıdi ol.

Sez týraly óz oıyn ortaǵa salǵan brıtanııalyq qazaqtardyń biri – Ismaıl Kesıjı. Ol qym-qýyt zamanda taǵdyrdyń tálkegine ushyrap, Altaı óńirinen Túrkııaǵa kóship ketken qandastarymyzdyń urpaǵy. Ózi ótken ǵasyrdyń jetpisinshi jyldarynda Túrkııadan Ulybrıtanııaǵa eńbek mıgranty retinde kelgen. Odan beri munda qandastarymyzdyń eki-úsh býyny ósip-óndi. Olar jyraqta júrse de Qazaqstanda bolyp jatqan jańalyqtardy izdep otyrady.

«Qazaqtar ata qonysty, jerdi saǵynady. Elde bolyp jatqan aqparattardy úzbeı qarap, oqyp otyrady. Ókinishke oraı, XXI ǵasyrda soǵys bolyp jatyr. Irak, Sırııadaǵy, Lıvııadaǵy soǵystarda musylmandardyń qany tógilip jatyr. Myna jerde bir-birimen hrıstıandar qan tógisip jatyr. Sondyqtan olardy toqtatatyn bir maqsat bolý kerek. Dinı lıderlerdi jınap, ortaq mámilege keltirý óte jaqsy is», - deıdi Ulybrıtanııadaǵy qazaq dıasporasynyń ókili Ismaıl Kesıjı.

Ulybrıtanııa halqynyń 60 paıyzy hrıstıan dinin ustansa, 26 paıyzy - ateıst. Budan bólek ıslam, ındýızm, sıkhızm sııaqty dinder de keń taraǵan. Mádenıetter men órkenıetter áralýandyǵyna qaramastan, olar ózara til tabysyp, yntymaqta ómir súrip jatyr. Biraq álemdegi jaǵdaı basqasha. Jergilikti jurtshylyq elordadaǵy dinder sezi osy olqylyqtyń ornyn toltyrýǵa óz septigin tıgizedi degen úmitte.