Anglııada Eýropadaǵy áıelder fýtbolyna arnalǵan alǵashqy stadıon boı kóteredi
ASTANA. KAZINFORM — Anglııanyń «Braıton end Hoýv Albıon» fýtbol klýby Eýropadaǵy áıelder fýtbolyna arnalǵan alǵashqy arnaıy stadıonnyń qurylys josparyn tanystyrdy, dep habarlaıdy Kazinform agenttiginiń Londondaǵy menshikti tilshisi.
Quny shamamen 100 mln dollar bolatyn jańa nysan áıelder komandasynyń turaqty úı arenasyna aınalady. Stadıon fýtbolshy qyzdardyń, qyzmetkerler men jankúıerlerdiń qajettilikterin eskere otyryp jobalanady.
Nysan aǵylshyn premer-lıgasynda óner kórsetip júrgen erler komandasynyń qazirgi stadıonynyń janynda ornalasady. Bastapqy syıymdylyǵy 10 myń kórermendi quraıdy, al eki arenany jaıaý júrginshiler kópiri baılanystyrady.
Qazirgi ýaqytta qurylysqa qajetti ruqsattardy alý jumystary júrgizilip jatyr. Klýb stadıondy 2030/31 maýsymynyń basynda ashýdy josparlap otyr.
Bul — Eýropadaǵy alǵashqy osyndaı joba jáne álemdegi sanaýly bastamalardyń biri. Mundaı arena alǵash ret AQSh-ta paıda boldy: «Kanzas-Sıtı Karrent» áıelder fýtbol klýby eki maýsym boıy «Sı-Pı-Keı-Sı Stedıým» stadıonynda oıyndaryn ótkizip keledi. Sonymen qatar, AQSh áıelder fýtbol lıgasynyń «Denver Sammıt» komandasy 2028 jylǵa deıin óz stadıonynyń qurylysyn aıaqtaýdy josparlap otyr.
Jańa stadıon áıelder fýtbolynyń erekshelikterine tolyq beıimdelip salynady. Alań standarttarynan bastap, kıim aýystyrý bólmeleri men qalpyna kelý aımaqtaryna deıin barlyq ınfraqurylym kásibı sportshylarǵa laıyqtalyp jasalady.
Sonymen qatar, jankúıerler úshin qolaıly ári otbasylyq atmosfera qalyptastyrýǵa basymdyq beriledi: keń qoǵamdyq keńistikter, oıyn-saýyq elementteri men qaýipsiz orta qarastyrylǵan.
Budan buryn fýtboldan elimizdiń áıelder lıgasynda alǵashqy týr aıaqtalǵanyn jazǵan bolatynbyz.
