Anglııada 14 jasar qyzdy qorlaǵan qylmyskerdi qatelikpen bosatyp jibergen
ASTANA. KAZINFORM — Ulybrıtanııada 14 jasar qyz ben eresek áıelge qatysty jynystyq qylmys jasaǵan jáne baspana suraýshy retinde sottalǵan adam qatelikpen bostandyqqa shyǵyp ketti, dep habarlaıdy DW.
London polıtsııasy Hadýsh Kebatý esimdi adamdy izdestirip jatyr. Ol 24 qazan, juma kúni Londonnan shamamen 70 shaqyrym qashyqtyqtaǵy Chelmsford qalasyndaǵy tergeý abaqtysynan qatelikpen bosatylǵan. Bul týraly polıtsııanyń resmı saıtynda habarlandy.
Quqyq qorǵaýshylardyń aıtýynsha, bosatylǵannan keıin Kebatý poıyzben astanaǵa baǵyt alǵan jáne qylmyskerdi izdeýge barynsha kúsh jumyldyrylǵan.
Oqıǵa qoǵamda úlken rezonans týdyrdy. Ulybrıtanııa premer-mınıstri Kır Starmer bul jaǵdaıǵa X áleýmettik jelisinde pikir bildirdi.
— Chelmsford túrmesinen qatelikpen bosatý múlde qabyldanbaıdy. Bul jaǵdaıǵa qatty narazy boldym. Tergeý júrgizilip jatyr, polıtsııa shuǵyl izdeýmen aınalysyp jatyr, meniń úkimetim bul sharalardy qoldaıdy. Bul adam tabylyp, jasaǵan qylmystary úshin elden shyǵarylady, dedi Starmer.
Sky News-tiń málimetinshe, 2024 jylǵy naýryzdan 2025 jylǵy naýryzǵa deıin Ulybrıtanııada qatelikpen 262 sottalǵan adam bosatylǵan. Bul kórsetkish aldyńǵy jylmen (115 oqıǵa) salystyrǵanda 128 paıyzǵa artyq. Olardyń 233-i túrmeden, al 29-y sot zaldarynan bosatylǵan.
Aıta keteıik, buǵan deıin Anglııa shirkeýin alǵash ret áıel basqarǵanyn jazǵanbyz.