Anglııa S gepatıtin tolyq joıýǵa jaqyndaı tústi
ASTANA. KAZINFORM — Sońǵy 10 jylda Anglııada S gepatıtinen 100 myńnan astam adam emdeldi. Zamanaýı terapııanyń arqasynda el Dúnıejúzilik densaýlyq saqtaý uıymy (DDSU) belgilegen 2030 jylǵa deıingi merzimnen buryn bul aýrýdy joıýy yqtımal.
S gepatıti baýyrdy zaqymdaıdy jáne emdelmegen jaǵdaıda tsırrozǵa, baýyr jetkiliksizdigine jáne baýyr obyryna ákelýi múmkin. Bul rette aýrý uzaq ýaqyt boıy aıqyn belgilersiz ótýi yqtımal. Sondyqtan keıbir naýqastar ınfektsııa juqtyrǵanyn baýyr qatty zaqymdanǵannan keıin ǵana biledi.
2015 jyly Anglııanyń Ulttyq densaýlyq saqtaý qyzmeti zamanaýı vırýsqa qarsy preparattardy keńinen qoldana bastady. Emdeý tabletka qabyldaý arqyly júrgiziledi jáne ádette 8-12 aptaǵa sozylady. 10 jyl ishinde 100 myńnan astam adam emdeldi. Bul — S gepatıti anyqtalǵan naýqastardyń 80 paıyzdan astamy. Osylaısha, Anglııa DDSU belgilegen mejeden asyp tústi, dep jazady zertteýge silteme jasaǵan Qazinform-nyń aǵylshyn redaktsııasy.
Osy kezeńde vırýstyń saldarynan bolatyn ólim-jitim 36 paıyzǵa tómendedi. Vedomstvonyń baǵalaýynsha, tıimdi emdeýdiń arqasynda aldaǵy 10 jylda baýyr transplantatsııasyn qajet etetin naýqastardyń sany 80 paıyzǵa qysqarýy múmkin.
Anglııada dıagnozy anyqtalmaǵan adamdardy qalaı anyqtaıdy
Negizgi mindetterdiń biri — ınfektsııa juqtyrǵanyn bilmeıtin adamdardy anyqtaý. 2022 jyldan bastap kóptegen jedel járdem bólimshelerinde qan taldaýy taǵaıyndalǵan patsıentterge qosymsha S gepatıtine test tapsyrý usynylady. Osy tásildiń arqasynda buryn dıagnozy qoıylmaǵan 1900 adamnan aýrý anyqtaldy.
Jalpy tájirıbelik dárigerler jańa patsıentterden 1996 jylǵa deıin qan quıylǵan-quıylmaǵanyn da suraıdy. Osylaısha Densaýlyq saqtaý mınıstrligi donorlyq qan arqyly ınfektsııa juqtyrǵan bolýy múmkin adamdardy anyqtaýǵa tyrysady.
Sonymen qatar qaýip tobyna jatatyn adamdarǵa úı jaǵdaıynda ózdiginen qoldanýǵa arnalǵan testi tegin ári qupııa túrde tapsyrys berýge múmkindik beriledi. Birinshi kezekte ınektsııalyq esirtki qoldanatyn nemese buryn qoldanǵan, shetelde tatýırovka jasatqan, sondaı-aq S gepatıti keń taralǵan elderden Anglııaǵa kóship kelgen adamdarǵa tekserýden ótý usynylady.
Budan bólek, vedomstvo Ýkraına, Rýmynııa, Estonııa, Latvııa, Polsha, Albanııa, Lıtva, Bolgarııa, Chehııa jáne Slovakııada týǵan eresekterdi test tapsyrýǵa shaqyrady. Olardyń keıbiri 1991 jyly zararsyzdandyrýdyń zamanaýı standarttary engizilgenge deıin medıtsınalyq nemese stomatologııalyq protsedýralar kezinde ınfektsııa juqtyrýy múmkin.
Anglııanyń densaýlyq saqtaý qyzmeti Blekbern qalasynda turatyn 65 jastaǵy Pol Itýell esimdi patsıenttiń oqıǵasyn da mysal retinde keltirdi. Onyń eshqandaı aýrý belgileri bolmaǵan. Infektsııa baýyrdy josparly tekserý kezinde anyqtalyp, jalpy tájirıbelik dáriger S gepatıtine test tapsyrýdy usynǵan.
Emdeý 12 aptaǵa sozylyp, osy kezeńde er adam kúnine bir tabletkadan qabyldap, birneshe ret qan taldaýyn tapsyrǵan. Em aıaqtalǵannan keıin ol ınfektsııa juqtyrý qaýpi bolýy múmkin adamdardy test tapsyrýǵa jáne tekserilýdi keıinge qaldyrmaýǵa shaqyrdy.
Buǵan deıin sanıtarııalyq-epıdemıologııalyq qyzmet vırýstyq gepatıtterdi juqtyrý qaýpin qalaı azaıtýǵa bolatyny týraly aıtyp bergen.
