Anglııa men Ýelste quıyndy daýyl men jańbyrdyń saldarynan myńdaǵan úı jaryqsyz qalýda
ASTANA. 30 sáýir. QazAqparat - Anglııa men Ýelste aǵashtardy elektr taratý jelilerine qulatqan uıytqyma jel men nóserli jańbyrlardyń saldarynan myńdaǵan úı elektr jaryǵynsyz qalyp otyr, dep habarlaıdy ITAR-TASS.
Jeksenbi kúni «Ýestern paýer» energetıkalyq kompanııasy habarlaǵandaı, elektr qýaty Kardıff pen Sýonsı qalalaryndaǵy birneshe myń úıde joq. Glostershır aǵylshyn graftyǵynda joldardyń boıyna 20-ǵa jýyq aǵash qulady.
Ótken túni eldiń kóptegen eldi mekenderinde shamamen 40 mm jaýyn-shashyn jaýǵan. Osyǵan baılanysty meteorolog mamandar 150 aýmaqta tasqyndardyń qaýpi týraly eskertý jasady. Severn ózeni men onyń aǵystary ótetin Shropshır, Herefordshır jáne Glostershır graftyqtarynda jaǵdaı asa qaýipti dep tanyldy. Olarda sýdyń deńgeıi qaýipti belgilerge deıin kóterildi.
