Anglııa quramasy Eýropa chempıonatynyń fınalyna shyqty

ASTANA. KAZINFORM — Fýtboldan 2024 jylǵy Eýropa chempıonatynda búgin, 11 shildede 1/2 fınaldaǵy ekinshi oıynda Anglııa men Nıderland quramalary kezdesti.

Kezdesý eki quramanyń tolassyz shabýylymen bastaldy. Dese de alǵashqy mınýttarda ekeýi de qatelikke boı aldyrǵan joq.

Oıynnyń 7-mınýtynda nıderlandtyq Havı Sımonstiń alystan tepken dobyn aǵylshyn qaqpashysy Djordan Pıkford qaıtara almady.

Óz qaqpasyna gol jiberip alǵannan keıin Anglııa quramasy tarazy basyn teńestirýge umtyldy. Nıderland quramasynyń qaqpasy mańynda jıi boı kórsetti. Osyndaı sátterdiń birinde nıderlandtyq qorǵaýshylar óz aıyp alańynda Anglııa shabýylshysy Garrı Keınge qarsy tártip buzdy.

Beıneqaıtalaýdy qarap shyqqan germanııalyq Felıks Tsvaıer Nıderland qaqpasyna penaltı belgiledi. Bul múmkindikti Garrı Keın múlt jibergen joq.

Al 91-mınýtta Anglııa sapynan Ollı Ýotkıns jeńis golyn soqty.

Osylaısha aǵylshyndyq fýtbolshylar 2:1 esebimen jeńip, fınalǵa joldama aldy.

Aıta ketsek, budan buryn jartylaı fınalda Ispanııa quramasy Frantsııany 2:1 esebimen tize búktirip, fınalǵa berilgen alǵashqy joldamaǵa ıe boldy.

Endi fınalda 14 shildede Berlın qalasyndaǵy «Olımpıashtadıonda» Ispanııa men Anglııa quramalary kezdesedi.