Angelına Lýkas álem chempıony atandy

ASTANA. KAZINFORM – Qazaqstandyq boksshy qyz Angelına Lýkas (10-1, 5 KO) Bangkokta (Taıland) ótken boks keshinde óner kórsetti. Ol álem chempıony ataǵy úshin judyryqtasty, dep habarlaıdy Sports.kz.

Angelına argentınalyq sportshy Anaı Lopespen (21-2-1, 1 KO) kúsh synasty. Olar ekinshi asa jeńil salmaqta bos turǵan IBO ataǵyn sarapqa saldy. Jekpe-jek eki mınýttan 10 raýndqa eseptelgen bolatyn. Kezdesý tóreshilerdiń sheshimimen qazaqstandyq boksshynyń paıdasyna sheshildi.

Osylaısha, Angelına Lýkas kásibı bokstaǵy 11-shi jeńisine qol jetkizip, IBO nusqasy boıynsha álem chempıony atandy. Al onyń qarsylasy Debora Anaı Lopes kásibı boksta úshinshi ret jeńildi.

Aıta keteıik, Angelına bıly WIBF jáne WBF nusqalary boıynsha ekinshi dárejeli chempıondyq beldikterdi jeńip alǵan bolatyn.