Angela Merkelge Nansen syılyǵy berildi

ASTANA. QazAqparat – Birikken Ulttar Uıymynyń Bosqyndar isi jónindegi joǵarǵy komıssar basqarmasy (BUU BJKB) 2022 jylǵy Nansen syılyǵy laýreatynyń esimin jarııalady. Bul joly qurmetti syılyq Angela Merkelge berildi, dep habarlaıdy QazAqparat BUU jańalyqtar saıtyna silteme jasap.

2015- 2016 jyldary Merkel Germenııa kantsleri qyzmetinde bolǵanda Sırııada qaqtyǵys aımaǵynda qalǵan 1,2 mln-nan astam bosqynǵa Germanııadan pana alýǵa múmkindik beretin birqatar mańyzdy sheshimder qabyldady. Sol kezindegi qıyndyqtarǵa qaramastan, Angela Merkel nemis halqyn «ózine senimdi jáne erkin, ashyq jáne janashyrlyqqa daıyn» bolýǵa jáne bosqyndarǵa kómektesýge shaqyrǵan edi.

BUU-nyń bosqandar týraly uıymy norvegııalyq zertteýshi, ǵalym, dıplomat jáne gýmanıst Frıtof Nansenniń qurmetine taǵaıyndalǵan syılyqty jyl saıyn usynady. Onyń laýreaty tek bir adam, adamdar toby nemese uıym bolýy múmkin.

Basty shart – bosqyndar, qonys aýdarǵandar nemese azamattyǵy joq adamdardyń quqyqtaryn qorǵaýǵa erekshe úles qosý. BUU-nyń bosqyndar isi jónindegi Joǵarǵy komıssary Fılıppo Grandı Merkeldiń baspana izdeýshilerdi qorǵaýǵa jáne adam quqyqtaryn, gýmanıtarlyq qaǵıdattardy jáne halyqaralyq quqyqty saqtaý jigerine joǵary baǵa berdi.

Foto: news.un.org