Angela Merkel Eýropanyń jańa joǵary marapatyna ıe boldy
ASTANA. KAZINFORM — Eýroparlament Merkeldiń EO-ǵa qosqan úlesin joǵary baǵalady, dep habarlaıdy Kazinform agenttiginiń Eýroodaqtaǵy menshikti tilshisi.
Búgin Strasbýrgte Eýroparlamenttiń jańa joǵary marapaty — Eýropalyq eńbegi úshin ordendi (European Order of Merit) tapsyrýdyń alǵashqy saltanatty rásimi ótti. «Distinguished Member» joǵary sanattaǵy alǵashqy laýreattardyń biri — Germanııanyń burynǵy kantsleri Angela Merkel boldy.
Jańa marapat eýropalyq ıntegratsııany damytýǵa, demokratııany jáne EO qundylyqtaryn nyǵaıtýǵa qosqan erekshe úlesti moıyndaý maqsatynda taǵaıyndalǵan. Jyl saıyn 20-dan aspaıtyn laýreat marapattalady. Angela Merkelmen birge joǵary dárejeli marapatqa Polshanyń burynǵy prezıdenti Leh Valensa men Moldova prezıdenti Maııa Sandý ıe boldy.
Saltanatty rásim jergilikti ýaqyt boıynsha saǵat 11:30-da bastalyp, tikeleı efırde kórsetildi.
Eýroparlamenttiń málimetinshe, 2005 jyldan 2021 jylǵa deıin Germanııa kantsleri qyzmetin atqarǵan Merkel EO úshin mańyzdy syn-qaterlerdi eńserýde sheshýshi ról atqarǵan. Atap aıtqanda, eýroaımaqtaǵy qarjy daǵdarysy, 2015 jylǵy kóshi-qon daǵdarysy, Brexit, COVID-19 pandemııasy jáne transatlantıkalyq qatynastardaǵy turaqsyzdyq kezeńinde erekshe kóshbasshylyq tanytqan.
— Merkel turaqtylyq pen pragmatıkalyq kóshbasshylyqtyń sımvolyna aınaldy. Onyń ymyraǵa kelý qabileti qıyn kezeńderde Eýropanyń birligin saqtap qalýǵa kómektesti, — dep atap ótti Eýroparlament ókilderi.
Sonymen qatar burynǵy kantslerdiń saıası murasy áli de qyzý pikirtalas týdyryp otyr. Germanııadaǵy ásire ońshyl saıasatkerler sol kezdegi úkimettiń kóshi-qon salasyndaǵy saıasatyn synǵa alyp, onyń saldarynan Taıaý Shyǵystan EO elderine mıgranttardyń kóptep kelgenin alǵa tartady.
Buǵan deıin Germanııanyń eks-kantsleri Angela Merkeldiń kitaby satylymǵa shyqqan sátten bastap bestsellerge aınalǵany habarlanǵan edi.
Budan bólek, Angela Merkelge Nansen syılyǵy berilgenin jazǵan bolatynbyz.
