Angela Merkel: Daǵdarystyń aıaqtalar shaǵy áli alys
ASTANA. 31 jeltoqsan. QazAqparat - Máseleni sheshýge baǵyttalǵan birqatar ekonomıkalyq reformalar óz jemisin berip jatqanyna qaramastan, eýroaımaqtaǵy qaryz daǵdarysynyń aıaqtalýy áli jaqyndar emes.
Bul týraly Germanııa kantsleri Angela Merkel jańa jyl aldyndaǵy halyqqa joldaýynda málim etti, dep habarlaıdy Reuters agenttigi.
GFR telearnalary 31 jeltoqsanda kórsetetin joldaýda kabınet basshysy memleket azamattaryn ekonomıkalyq qıyndyqtardy sabyrlylyqpen ótkerýge shaqyrdy. Saıasatkerdiń paıymynsha, Germanııanyń órkendeýi búkil Eýroodaqtyń ál-aýqatyna táýeldi. Sondaı-aq 2013 jyly saılaýdan keıin óz laýazymyn saqtap qalýdy josparlap otyrǵan A.Merkel, óz kabınetiniń qol jetkizgen jetistikterine de toqtala ketti. Úkimet basshysy atap ótkenindeı, Germanııadaǵy jumyssyzdyq deńgeıi 1990 jyldan beri eń az kórsetkishke tómendep, sáıkesinshe, halyqtyń jumyspen qamtylýy rekordtyq shamaǵa deıin kóterilgen.
«Bul Germanııada júzmyńdaǵan otbasy óz keleshegine senimdi ekendigin bildiredi», - dep esepteıdi A.Merkel. sonymen birge, onyń sózine qaraǵanda, 2013 jyly ekonomıkalyq jaǵdaı 2012 jylmen salystyrǵanda aýyrlaý bolyp, JІÓ ósý qarqyny baıaýlaýy múmkin.
Aıta keteıik, osydan birneshe kún buryn GFR-diń Qarjy mınıstri Volfgang Shoıble daǵdarystyń eń aýyr kezeńi ótip ketkendigin málimdegen bolatyn. Alaıda A.Merkel ózgeshe pikir bildirdi. Onyń oıynsha, eýroaımaqtaǵy qudyraý áli 5 jylǵa sozylýy bek múmkin.
