«Angara» áýe kompanııasynyń tehnıkalyq qyzmet kórsetý sertıfıkaty kúshin joıdy

ASTANA. KAZINFORM — Rosavıatsııa Irkýtskidegi «Angara» áýe kompanııasynyń áýe kemeleri men olardyń bólshekterine tehnıkalyq qyzmet kórsetýge ruqsat beretin sertıfıkatyn joıdy, dep habarlaıdy TASS.

Bul sheshim jospardan tys tekseristen keıin qabyldanǵan. Tekserýdi Rostransnadzor men Rosavıatsııa mamandary birlesip júrgizgen. Vedomstvonyń málimetinshe, tekserý barysynda «Angara» áýe kompanııasynyń jumysynda birqatar buzýshylyq anyqtalǵan.

— Mysaly, keıbir qujat naqty jumys oryndalmaǵan jaǵdaıda rásimdelgen, al qajet qural-jabdyqtar men tehnıka múldem qoldanylmaǵan, — dep habarlady Rosavıatsııa.

Vedomstvo bul zańbuzýshylyqtar ushý qaýipsizdigine tikeleı áser etetinin atap ótti. Bul derekterge áýe kompanııasynyń ókilderi de kelisken.

Sonymen qatar, «Angara» bolashaqta mundaı jaǵdaılardyń aldyn alýǵa qatysty qandaı da bir kepildik beretin materıaldardy usyna almaǵan.

Endi «Angara» áýe kompanııasy áýe kemelerine tehnıkalyq qyzmet kórsetýdi tek resmı sertıfıkaty bar úshinshi tarap uıymdary arqyly júzege asyrýy tıis.

Eske salsaq, 24 shilde kúni «Angara» áýe kompanııasyna tıesili An-24 jolaýshylar ushaǵy Reseıdiń Amýr oblysynda Tynda qalasynyń áýejaıyna qoný kezinde ekinshi aınalymǵa shyǵyp, keıin baılanysqa shyqpaı qalǵan. Ushaq bortynda 40-tan astam adam bolǵany aıtyldy. Keıinirek ushaqtyń qaldyqtary Tyndadan 16 shaqyrym qashyqtyqtaǵy taýly aımaqtan tabyldy.

Osy oqıǵaǵa baılanysty Qazaqstan Prezıdenti Qasym-Jomart Toqaev Reseı Prezıdenti Vladımır Pýtınge kóńil aıtty.