Ańǵal ájeı depozıttegi 24 mln teńgesin sheship alyp, alaıaqtarǵa bermekshi bolǵan

PAVLODAR. KAZINFORM — Pavlodar qalasynda turatyn Lıdııa Fedorovna jyldar boıy bankte jınaǵan qarajatynan bir sátte aırylyp qala jazdady. Ony sheshýshi sátte qurbysynyń qyraǵylyǵy qutqaryp qalǵan.

«Jaryqpen qamtý ortalyǵynanbyz» dep telefon shalǵan áldebireý zeınetkerge «úıińizdegi eseptegishti plombalaý kerek, sol úshin SMS kod jiberip jatyrmyz» dep aldap, 1414 servısinen kelgen kodty alyp alǵan. Ańǵal ájeı áńgime ústinde bankte óziniń qomaqty somada depozıti bar ekenin de aıtyp qoıady.

Keıin zeınetkerge bank atyn jamylyp ózge bir alaıaq qońyraý shalady. Ol depozıttegi aqshany qaskúnemder sypyryp alýǵa árekettenip jatqanyn aıtyp, tez arada ony «qaýipsiz shotqa» salý kerek dep kóndiredi. Alaıaqtyń nusqaý berýi boıynsha Lıdııa Fedorovna bankke baryp, depozıttegi 24 mln teńgesin sheship alady da ony alyp ketetin kýrerdi kútedi. Tipti bankke komıssııa úshin 800 myń teńge tóleýge májbúr bolǵan.

Osy eki ortada zeınetker qurbysyna baryp, mán-jaıdy aıtqanda ol birden kúdiktenip ýchaskelik ınspektorǵa habarlasqan.

— Qurbysynyń qyraǵylyǵy men polıtseılerdiń jedel áreketi zeınetkerdi alaıaqtardyń qurbany bolýdan qutqaryp qaldy. Qazirgi ýaqytta alaıaqtyq deregi boıynsha tergeý bastaldy. Qońyraý shalǵan alaıaqtardyń abonenttik nómirleri anyqtalyp, kúdiktiler izdestirilip jatyr, — dep málimdedi Pavlodar oblysy polıtsııa departamenti kıberqylmyspen kúres basqarmasynyń bastyǵy Ashat Abetjanov.

Lıdııa ájeıdiń aıtýynsha, barlyǵy bastapqyda tús sekildi kóringen.

— Shynymen alaıaqtardyń ár sózine senip qaldym. Tek polıtsııanyń jedel áreketteri men qurbymnyń saqtyq kórsetkeniniń arqasynda jyldar boıy tirnektep jınaǵan aqshamdy urlatpaı, qaıtarýǵa múmkindik týdy, — deıdi zeınetker.

Eske sala keteıik, Qazaqstannyń eki azamaty Aýstralııa kazınosynan alaıaqtyq jolmen 1,17 mıllıon dollar utyp aldy dep aıyptaldy.