Ańǵa shyqpasam aýyryp qalamyn — 13 tazy asyrap otyrǵan saıatshy
TÚRKІSTAN. KAZINFORM — Saýran aýdanyna qarasty Abaı aýylynyń turǵyny Sultan Erimbetovtyń 13 tazy ıti bar.
Barshasyna en salyp, at qoıyp qoıǵan. Máselen, ıtterdi alǵyrlyǵyna qarap Qarshyǵa, Kókdaýyl, Keremet, Suńqar dep ataıdy. Al ańǵa barlyǵyn birge alyp shyǵady.
Shı tazylar qoıandy kóp aýlaıtyn bolsa, qýmaı tazy men dúreki tuqymdasy túlki men shıbórige kóp shabady.
— Atam men ákem tazy ustaǵan. Men de kishkentaıymnan ıt asyrap kelemin. Tuqymynan kóbeıtip jatyrmyn. Tazynyń qýmaı degen túri irileý keledi. Al, dúreki — tóbet pen tazynyń býdandasýynan shyqqan. Shydamdy, tońbaıdy. Shı tuqymdas tazy jińishke bolady. Qazir 10 qýmaı, 2 dúreki, bir shı tazy ıtim bar, — deıdi saıatshy.
Sultan Erimbetov tazylardyń kópshiligin ózi kúshik kezinen asyraǵan. Al, ishindegi irilerin Taraz, Shymkent qalalarynan arnaıy alyp kelipti.
Bireýiniń baǵasy bir jabaǵynyń qunyna teń.
— Ańǵa bárin birge alyp shyǵamyn. Bári úıretilgen. Tazylardyń ańǵa degen ózindik qyzǵýshylyǵy bolady. Qanynda bar. Kúshikteri analarymen birge júrip aýyzdyqtanady. Keıin birin-biri súıreıdi, — deıdi ol.
Kún sýytyp, qys túskennen bastap Sultan Saıfýllauly da qajetti zattaryn túgendep, ańǵa shyǵýǵa daıyndalady.
Kún saıyn, keıde aptasyna eki ret taýǵa shyǵady. Saıatshynyń qorjyny búginge deıin bos qaıtpaǵan.
— Qazan aıynan bastap tazylar da taýǵa qarap qyńsylap, shýlap qoıa beredi. Qasqyr, qoıan, túlki alyp keledi. Shıbórini kóp aýlaıdy. Sebebi bizdiń jaqta kóbeıip ketken. Odan bólek, eki tóbetim bar. Olar tazylardyń qasynda júredi. Kóbine shoshqaǵa shyqqanda qosylady. Ózim taýǵa shyqpasam aýyryp qalamyn. Atym bar. Biraq kóbine jaıaý júremin. Al, jylqyny qar qalyń kezde ǵana minemin, — deıdi saıatshy.
Sultan Saıfýllauly búrkit te baǵyp kórgen. Biraqtan tuzdalǵan et jep qoıǵan tuz taǵysyn aman alyp qalý múmkin bolmapty. Al tazysynyń sany 20-ǵa deıin kóbeıgen. Eki-úsheýin surap kelgen aǵaıyn týystyń kóńilin qaldyrmaı, jetektetip jiberipti.
Tazylardyń kútimi de bólek. Aptasyna bir qap un jeıdi. Sondaı-aq, et qaldyqtarymen qorektenedi. Ony Sultan bazarǵa baryp, qasapshylardan ákeledi.
Keıbirin tegin alsa, keıde satyp alady. Qaınatyp, sorpasynan bylamyq jasap beredi.
— Jan-jaqty kútim kerek. Óz balańa qaraǵandaı aıalap, kútip-baqpasa ańǵa shappaıdy. Baǵý, baptaý qıyn, jazda sý seýip otyramyn. Jalpy tazy baqqandy unatamyn, satpaımyn. Asharshylyq kezinde bir tazy bir aýyldy asyraǵan goı. Sondyqtan bul ıttiń kıesi bar. Ózim alysqa ketkende jubaıym bas-kóz bolady. Itterdi 4 jasar qyzym da qatty jaqsy kóredi. Tipti kúshikterin kóterip, arqalap júredi, — deıdi ol.
Aıta keteıik, budan buryn «Uly dala joryǵy» halyqaralyq marafon-báıgesi qashan bastalatynyn jazǵan bolatynbyz.