Anestezıologııalyq jáne reanımatologııalyq kómek kórsetý standarty ózgertildi
ASTANA. KAZINFORM – Densaýlyq saqtaý mınıstri 2025 jylǵy 4 tamyzdaǵy buıryǵymen anestezıologııalyq jáne reanımatologııalyq kómekti uıymdastyrý standartyna ózgerister engizdi.
Erejege kelesi uǵym engizildi:
– 18 jasqa tolmaǵan (kámelet jasyna jetpegen) tulǵa.
Túzetýlerge sáıkes, operatsııalyq-anestezıologııalyq táýekeldi aıqyndaý, anestezııanyń (aýyrsynýdy basý) ádisin tańdaý jáne operatsııa aldyndaǵy daıyndyq júrgizý úshin patsıentti josparly operatsııalyq aralasý aldynda anestezıolog-reanımatolog dárigeri qaraıdy. Eresekterdi otaǵa deıin 24-48 saǵattan keshiktirmeı, balalardy 12-24 saǵattan keshiktirmeı baqylaý kerek.
Sondaı-aq anestezıologııalyq kómek ambýlatorııalyq nemese statsıonardyń ornyn almastyratyn jaǵdaıda anestezıolog-reanımatolog nemese keminde 3 dárigerden turatyn anestezıolog-reanımatologtar toby tarapynan kórsetiledi jáne oǵan eresekterdi josparly operatsııa aldynda 24-48 saǵattan keshiktirmeı, balalardy 12-24 saǵattan keshiktirmeı qaraý, sondaı-aq anestezııa aldynda patsıentti taǵy baqylaý kiredi.
Standartqa engizilgen tolyqtyrýǵa sáıkes, ambýlatorııalyq jaǵdaıda balalarǵa anestezıologııalyq kómek eńbek ótili keminde 7 jyl bolatyn balalar anestezıolog-reanımatology tarapynan kórsetilýi tıis.
Ambýlatorııalyq jáne statsıonardyń ornyn almastyratyn jaǵdaıda kelesi jaǵdaıda anestezıologııalyq kómek kórsetilmeıdi:
– ókpeniń uzartylǵan jasandy jeldetilýin talap etse;
– patsıentti reanımatsııa bóliminde baqylaýdy qajet etse;
– uzaq operatsııadan keıingi baqylaý (6 saǵattan astam);
– balalarda 6 saǵattan astam anestezıologııalyq kómekti qajet etse.
Ambýlatorııalyq jaǵdaıda anestezııa mindetti túrde kapnografııasy bar narkoz-tynys alý apparaty jáne qan gazy taldaǵyshy bar jumys ornynda júrgiziledi.
Sondaı-aq patsıentterge statsıonar jaǵdaıynda anestezıologııalyq jáne reanımatologııalyq kómek anestezıolog-reanımatologtar tarapynan kórsetiledi jáne oǵan eresekterdi josparly operatsııa aldynda 24-48 saǵattan keshiktirmeı, balalardy 12-24 saǵattan keshiktirmeı, al shuǵyl járdem kezinde ota jasaý týraly sheshim qabyldanǵannan keıin tekserý kerek.
Standartqa mynadaı jańa tarmaq qosyldy:
– Patsıent anestezıologııa, reanımatsııa jáne qarqyndy terapııa bólimshesinde jatqan kezde negizgi aýrýyna sáıkes beıindi bólimshe boıynsha esepte turady.
– Kezeńdik epıkrızderdi, klınıkalyq dıagnozdyń negizdemesin, qaıtys bolǵannan keıingi epıkrızdi beıindi bólimsheniń emdeýshi dárigeri jasaıdy.
– Beıindi bólimshe meńgerýshisi nemese beıini boıynsha emdeýshi dáriger (demalys jáne mereke kúnderi, túnde beıini boıynsha kezekshi dáriger) patsıent ARQTB-da jatqan búkil kezeńde kún saıyn qarap, patsıenttiń medıtsınalyq kartasyn toltyrady jáne quzyreti sheginde emdeý-dıagnostıkalyq is-sharany júrgizedi.
Buıryq 2025 jylǵy 23 tamyzdan bastap qoldanysqa engiziledi.
Buǵan deıin elimizde alǵashqy medıtsınalyq kómektiń jańa modeli týraly jazǵan edik.