Anestezıolog operatsııaǵa qalaı daıyndalý keregin aıtty
Mamannyń aıtýynsha, operatsııaǵa daıyndyq kezinde kúndelikti ádettegi ómir saltyn saqtaı otyryp, azdaǵan erekshelik engizgenińiz jón. Mindetti túrde hırýrgpen jáne anestezıologpen sóılesý kerek, olar ota men narkozdyń ereksheligin túsindiredi. Tolyq túsinip alyp, birlesip sheshim qabyldaǵan kezde operatsııaǵa ázirlik te oıdaǵydaı júredi.
Operatsııaǵa daıyndyq kezinde mynalardy eskergen jón:
– Operatsııaǵa deıin, 3 saǵat qalǵanda eshqandaı suıyqtyq ishýge bolmaıdy. Sonymen birge otadan 6 saǵat buryn tamaqtanbaǵan jón;
– Operatsııa aldynda ishimdik ishýge, temeki shegýge bolmaıdy;
– 3 saǵattyq úzilisti eskere otyryp, operatsııa kúni tańerteń sý, jeńil shyryn sııaqty suıqtyqtardy ishýge bolady;
– Anestezıolog pen hırýrgke qabyldaıtyn dári-dármekter týraly aıtýdy umytpańyz;
– Uıqy mindetti túrde qanýy kerek. Eger tolqý sezimi bolsa, operatsııa aldynda, túnde jeńil uıyqtatatyn dári qabyldaýǵa bolady;
– Operatsııa jasalatyn jerdiń terisin jaraqattap alýdan saqtanǵan jón, sondaı-aq qyryný kezinde abaılańyz;
– Anestezıolog aldyn ala narkozdyń túrlerin, balamalaryn, qaýpi men artyqshylyqtaryn túsindirip, eń jaqsy sheshimdi usynýy kerek. Biraq tańdaý men sońǵy sheshimdi naýqastyń ózi qabyldaıdy;
– Bastysy naýqas operatsııa men narkoz kezinde baqylaý jabdyǵy men bilikti mamandardyń únemi muqııat nazarynda bolatynyn esten shyǵarmaýy kerek. Naýqastyń densaýlyǵy men jaılylyǵy úshin bári jasalatynyn túsiný eń kúrdeli sátterge daıyn bolýǵa kómektesedi.