Anelıa Mamyrova: Armenııa quramasyna soqqan debıýttik golymnan keıin kózime jas aldym
ASTANA. KAZINFORM – Fýtboldan Qazaqstan áıelder ulttyq quramasy 2027 jylǵy álem chempıonatynyń irikteý kezeńin sátti bastady. Armenııa quramasyn jeńip, alǵashqy upaılaryn enshilegen arýlarymyz endi 7 naýryz kúni elordada Belarýs komandasymen baq synaspaq. Mańyzdy match aldynda qurama oıynshylary Anelıa Mamyrova, Nazym Aldanazar jáne Qazyna Narbaeva «Jibek Joly» telearnasynyń «Búgin.LIVE» baǵdarlamasyna suhbat berip, jeńisti kezdesýden alǵan áseri men jeke ómirleri týraly syr shertti.
Armenııaǵa qarsy ótken oıyn Qazaqstan quramasy úshin ońaı bolǵan joq. Alaıda qazaqstandyq fýtbolshylar qarsylastarynan bir bas joǵary ekenin dáleldeı bildi.
– Armenııa quramasymen buryn da oınaǵanbyz. Myqty qarsylas. Bul oıynda men ulttyq qurama sapyndaǵy alǵashqy debıýttik golymdy soqtym. Keremet sezimdi bastan keshtim, tipti qýanyshtan kózge jas aldym. Endi aldaǵy 7 naýryz kúni Astana Arenada Belarýs quramasyna qarsy oınaımyz. Daıyndyq qyzý júrip jatyr, - deıdi ulttyq qurama oıynshysy Anelıa Mamyrova.
Qazirgi tańda qyzdar fızıkalyq jáne psıhologııalyq turǵydan qarqyndy daıyndyq ústinde ekenin aıtty. Eger aldaǵy Belarýs pen Armenııaǵa qarsy oıyndarda jeńiske jetse, Qazaqstan quramasy «B» lıgasyna joldama alady.
Oıynshylardyń aıtýynsha, fýtbol olar úshin jaı ǵana jumys emes, ómirleriniń ajyramas bir bóligine aınalǵan.
– Meni fýtbolǵa aýylda aǵam baýlydy. Bala kezimizde uldarmen birge kúnge kúıip, dop qýyp júretinbiz. Basynda ata-anamyz jaraqat alyp qala ma dep ýaıymdap, qarsy bolǵany ras. Biraq qazir olar – bizdiń eń úlken jankúıerlerimiz. Sportpen aınalysqan soń syrt kózge qatal kórinýimiz múmkin, biraq ishki náziktik eshqashan joǵalmaıdy. Náziktik – qyz balanyń jaratylysynda bar nárse, - deıdi Qazyna Narbaeva.
Suhbat barysynda qyzdar kásibı sport pen jeke ómirdi qatar alyp júrýge bolatynyn da tilge tıek etti. Nazym Aldanazardyń sózinshe, 11 jasynda fýtbolǵa kelgennen beri onyń bul sportqa degen qyzyǵýshylyǵy esh kemimegen.
– Ár sátten lázzat alamyz. Alańǵa shyqqanda bárin umytamyz. Jankúıerlerdiń qoldaýy bizge úlken kúsh beredi, - dep túıindedi sózin Nazym.
Eske sala keteıik, Qazaqstan áıelder quramasy álem chempıonatynyń irikteý kezeńin sátti bastap, týrnırlik kestedegi pozıtsııasyn jaqsartty.
