Andjelına Djolı taǵy da Gazany qoldaıtynyn aıtty
ASTANA. KAZINFORM – Álemge tanymal aktrısa Andjelına Djolı Instagram jelisindegi paraqshasynyń «story» bólimine «Shekarasyz dárigerler» (MSF) uıymynyń málimdemesin bólise otyryp, Gaza halqyn qoldaıtynyn aıtty, dep jazdy Anadoly.
MSF-tiń jarııalanymynda bylaı delingen:
«Gaza — palestınalyqtar men olarǵa kómek kórsetkisi kelgenderdiń ortaq zıratyna aınaldy».
Málimdemede Izraıl armııasy oq atýdy toqtatqannan keıin de áýe, qurlyq jáne teńiz arqyly Gaza sektoryna shabýyldaryn qaıta bastaǵany aıtylyp, mynandaı derekter keltirilgen:
-
Palestınalyqtardyń ómiri júıeli túrde joıylyp jatyr,
-
Halyq kúshtep kóshirilip jatyr,
-
Eń negizgi gýmanıtarlyq kómek ádeıi bógelip jatyr.
Uıym Izraıl shabýyldarynyń Gazadaǵy gýmanıtarlyq jáne medıtsına qyzmetkerleri úshin úlken qaýip tóndirip otyrǵanyn atap ótti.
MSF baıandamasynda Izraıl bıliginen:
-
Gazadaǵy qatigez ári ólimge ákeletin qorshaýdy toqtatýǵa,
-
Palestınalyqtardyń, gýmanıtarlyq jáne medıtsınalyq qyzmetkerlerdiń ómirin qorǵaýǵa,
-
Atysty toqtatý tártibin qalpyna keltirýge shaqyrdy.
Djolıdiń buǵan deıingi málimdemesi
Andjelına Djolı 2023 jylǵy 1 qarashada Instagram paraqshasynda Izraıldiń Gazaǵa jasaǵan shabýyldaryna alǵash ret pikir bildirgen edi. Ol jazbasynda:
«Gaza turǵyndary — tyǵyryqqa tirelgen halyq. Olarǵa qashyp qutylatyn esh múmkindik berilmeı, ádeıi bombalap jatyr. Sońǵy 20 jyl ishinde Gaza ashyq aspan astyndaǵy túrmege aınaldy. Endi ol úlken zıratqa uqsap barady», — degen bolatyn.
Aktrısa Gazada balalar men otbasylardyń qyrǵynǵa ushyraýyna nazar aýdaryp:
«Mıllıondaǵan palestınalyq beıbit turǵyndar — balalar, áıelder, otbasylar — ujymdyq jaza men adamgershilikke jatpaıtyn qatygezdikke ushyrap jatyr. Olar azyq-túlik, dári-dármek pen gýmanıtarlyq kómekten aıyrylǵan. Bul — halyqaralyq quqyqqa qaıshy, al álem buǵan qarap otyr, tipti keıbir úkimetter qoldap otyr», — dedi.
Sóz sońynda Djolı:
«Álemdik kóshbasshylar BUU Qaýipsizdik keńesi arqyly atysty toqtatýǵa májbúrleýdiń ornyna únsiz qalý arqyly bul qylmystarǵa seriktes bolyp otyr», — dep málimdedi.
Eske sala keteıik, buǵan deıin Andjelına Djolı Aýǵanstandaǵy ahýal jaıynda baıandaý úshin Instagram-da paraqsha ashqan bolatyn.