Andjelına Djolı Aýǵanstandaǵy ahýal jaıynda baıandaý úshin Instagram-da paraqsha ashty
NUR-SULTAN. QazAqparat – BUU-nyń bosqyndar isi jónindegi izgi nıet elshisi Andjelına Djolı Aýǵanstandaǵy ahýalǵa nazar aýdartý úshin Instagram-da paraqsha ashty, dep habarlaıdy QazAqparat tilshisi CNN-ge silteme jasap.
Djolı juma kúni ashqan paraqshasynda aty-jóni men mekenjaıy búrkemenlegen aýǵan qyzynyń hatyn jarııa etti. Qyz hatynda tálipterdiń bıligi kezinde óziniń ómirine alańdaıtynyn jáne qorqatyndyǵyn jazady.
«Tálipter basyp alǵanǵa deıin quqyǵymyz boldy. Quqymyzy erkin qorǵaı da alatyn edik. Olar kelgennen keıin barlyǵymyz da qorqyp otyrmyz ári búkil armanymyzdyń kúli kókke ushady dep oılaımyz», - deıdi aýǵan qyzy hatynda.
Birikken Ulttar uıymynyń bosqyndar isi jónindegi ızgi nıet elshisi Andjelına Djolı hat astyna qaldyrǵan pikirinde óziniń negizgi quqyǵymen kúresip júrgen búkil álemdegi adamdardyń tarıhy týraly jazýdy josparlap otyrǵandyǵyn atap ótedi.
«11 qyrkúıektegi lańkestik áreketten 2 apta buryn Aýǵanstan shekarasyna baryp, tálipterdiń rejımi saldarynan elden qashqan bosqyndarmen kezdeskenmin. Bul osydan 20 jyl buryn bolǵan edi. Aýǵandyqtardyń taǵy da elin jaılaǵan belgisizdikten qorqyp, bosqynǵa aınalýyn kórgennen janyń aýyrady», - dep jazady Djolı.
Talıban eldi basqarý isin ózgertetindigin jarııa etkenine qaramastan turǵyndardyń basym kópshiligi oǵan senimsizdikpen qarap otyr. Qundyz qalasy turǵyndarynyń biri tálipterdiń ózgeretindigine shák keltiredi.
«Olar ortaq qundylyqtardy aýǵan halqymen bólispeıdi. Demokratııa – bul olar úshin emes», - dedi ol.
Ádilet Seıilhanov
Aıta keterligi, myńdaǵan aýǵandyq elden ketýge tyrysyp, Kabýldegi Hamıd Karzaı atyndaǵy halyqaralyq áýejaıynda tártipsizdik ornatqan bolatyn.
