Andjelına Djolı 1958 jylǵy qymbat Ferrari kóligin aýktsıonǵa qoıady
ASTANA. Kazinform – Amerıkalyq aktrısa Andjelına Djolı qarasha aıynda 1958 jyly shyǵarylǵan Ferrari 250 GT kóligin aýktsıonǵa qoıady. Bul týraly «Christie's» aýktsıon úıi habarlady.
Bul kólik Ferrari kompanııasy shyǵarǵan 353 dananyń on birinshi kóligi ekeni atap ótildi. Kólikte 3 lıtrlik Colombo V12 qozǵaltqyshy bar jáne bes jyldamdyqty mehanıkalyq qorappen jabdyqtalǵan. Kóliktiń syrty qara túspen bezendirilgen, al ishki jaǵy ashyq qyzyl bylǵarymen qaptalǵan. Ferrari bar bolǵany 10 000 shaqyrym júrgen.
250 GT sýperkar alǵash ret 1958 jyly Parıj avtosalonynda kórsetildi. Ol túpnusqadaǵy Borrani dóńgelekterimen jáne alıýmınıı baraban tejegishterimen jabdyqtalǵan.
Christie's avtokóliktiń bastapqy qozǵaltqyshy ornatylǵanyn rastady, biraq ol 1978 jyly kók jáne aq túske boıalǵan, ınterer qaradan qyzylǵa ózgergen. Aýktsıon úıi aktrısanyń kólikti qansha ýaqyt ıelengenin nemese ony múldem paıdalanbaǵanyn aıtýdan bas tartty.
Sondaı-aq, Djolıdiń kólikti ne úshin satyp jatqany belgisiz. Juldyzdyń bul Ferrarıdi aıdap júrip túsken sýreti joq. Aktrısa jáı ǵana qajetsiz zattardan qutylýda degen boljam bar.
Ádette mundaı sırek kólikter shamamen 0,5 mıllıon dollarǵa satylady. Christie's aýktsıon úıi kólikti 660 myńnan 880 myń dollarǵa deıin baǵalaýda.
