Ándijanda TÚRKSOI halyqaralyq teatr festıvali ashyldy
ASTANA. KAZINFORM — Túrki áleminiń 2026 jylǵy mádenı astanasy atanǵan Ándijan qalasynda IV Halyqaralyq TÚRKSOI teatr festıvali «Babyr: saǵynysh» spektaklimen ashyldy, dep habarlaıdy Kazinform agenttiginiń Ankaradaǵy menshikti tilshisi.
IV Halyqaralyq TÚRKSOI teatr festıvali Ózbekstanda bastaldy. Ashylý saltanatyna túrki elderiniń ókilderi qatysty. Teatr ujymdary men ártister qyzyl kilemmen júrip ótti.
Saltanatty sharaǵa TÚRKSOI bas hatshysy Sultan Raev, Ózbekstan mádenıet mınıstriniń birinshi orynbasary Nodırbek Saıfýllaev jáne Ándijan oblysy hokıminiń orynbasary Rýstamjon Egamberdıev qatysty.
Sultan Raev festıval túrki halyqtary arasyndaǵy mádenı baılanysty nyǵaıtýǵa jáne ortaq kórkem murany damytýǵa baǵyttalǵanyn aıtty. Al Nodırbek Saıfýllaev forýmnyń Ándijanda ótýi baýyrlas elder arasyndaǵy dostyq pen yntymaqtastyqty nyǵaıtýǵa yqpal etetinin atap ótti.
Festıval baǵdarlamasyn Ándijan teatry Ýsmon Azımniń pesasy boıynsha sahnalanǵan «Babyr: saǵynysh» spektaklimen ashty. Tarıhı drama Uly Moǵoldar ımperııasynyń negizin qalaǵan bıleýshi ári aqyn Zahırıddın Muhammed Babyrǵa arnalǵan.
Babyrdyń beınesin Zafarbek Saıbýrhanov somdady. Qoıylymda keıipkerdiń týǵan jerine degen súıispenshiligi, meıirimdiligi jáne jaqyndary úshin ózin qurban etýge daıyn ekeni sýretteledi. Spektakl kórermenderdiń qoshemetine bólendi.
Festıval aıasynda Ándijanda túrki áleminiń túrli elderinen kelgen teatr ujymdary óner kórsetedi. Forým shyǵarmashylyq tájirıbe almasýǵa jáne teatr óneri salasyndaǵy yntymaqtastyqty nyǵaıtýǵa baǵyttalǵan.
Eske salaıyq, buǵan deıin Ankarada TÚRKSOI uıymynyń IX Áıelder jáne etno-sán aptalyǵy bastaldy. Oǵan túrki álemindegi memleketter men óńirlerdiń dızaınerleri jáne mádenıet ókilderi jınalǵanyn habarlaǵanbyz.
