Ándijanda qazaqstandyq teatr ujymynyń «Jibek» spektakli kórsetildi - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Toqaev ǵylym men bilimdi damytý jáne tsıfrlyq ekonomıkany qalyptastyrý mindetterin belgiledi – Eurasia Today
Memleket basshysy Qasym-Jomart Toqaev búgingi Joldaýynda ǵylym men bilimdi damytý jáne tsıfrlyq ekonomıkany qalyptastyrý mindetterin belgiledi, dep habarlady Qyrǵyzstan astanasy Bishkekte shyǵatyn Eurasia Today aqparat agenttigi.
Eýrazııa Týdeıdiń Aqordanyń resmı Telegram-daǵy arnasyna silteme jasap habarlaýy boıynsha, Prezıdent Qazaqstannyń aldaǵy ýaqytta qýatty ekonomıkasy bar, joǵary tehnologııalar men ǵylym-bilimge negizdelgen ozyq memleketke aınalýy qajettigin atap aıtty.
Prezıdent jahandyq daǵdarystar men túrli syn-qaterler jaǵdaıynda eldegi turaqtylyqty saqtap, memlekettiń básekege qabilettiligin arttyrýda sapaly bilim men sanaly urpaq tárbıeleýdiń mańyzy zor ekenin aıtty. Sondaı-aq keleshek urpaqqa ǵylymı áleýeti joǵary, ınnovatsııaǵa beıim ári jasampaz eldi amanat etý negizgi strategııalyq mindetterdiń biri ekenin basa aıtty.
«Joldaýda tsıfrlandyrý men jasandy ıntellekt tehnologııalaryn ekonomıkanyń jáne áleýmettik salanyń barlyq baǵytyna engizý qajettigine erekshe nazar aýdaryldy. Memleket basshysy osy baǵyttaǵy jumysty jalǵastyryp, jasandy ıntellektke negizdelgen tsıfrlyq ekonomıkany qalyptastyrýdyń mańyzyn atap aıtty», dep jazdy Eurasia Today aqparat agenttigi.
Sondaı-aq osy aptada «Eurasia Today» basylymynda «Qazaqstan delegatsııasy Túrkııanyń agrarlyq salany tsıfrlandyrý tájirıbesin zerdeledi» degen taqyryptaǵy aqparat jaryq kórdi.
Qazaqstan Respýblıkasy Aýyl sharýashylyǵy mınıstrliginiń delegatsııasy Túrkııaǵa jumys sapary barysynda agrarlyq salany tsıfrlandyrý, aýyl sharýashylyǵy tehnıkasyn óndirý jáne ǵylymı ázirlemelerdi óndiriske engizý tájirıbesimen tanysty. QR Aýyl sharýashylyǵy mınıstrliginiń málimetinshe, Azyq-túlik qaýipsizdigi jónindegi Islam uıymynyń qoldaýymen uıymdastyrylǵan sapar aıasynda qazaqstandyq mamandar Ankara men Konıa qalalaryndaǵy beıindi mekemeler men kásiporyndardy aralady. Delegatsııa Túrkııanyń agrarlyq saladaǵy aqparattyq júıelerin, ǵylymı-zertteý jumystaryn, zamanaýı agrotehnologııalardy qoldaný jáne aýyl sharýashylyǵy tehnıkasyn óndirý tájirıbesin zerdeledi. Bul yntymaqtastyq eki el arasyndaǵy tájirıbe almasýǵa jáne Qazaqstannyń agrarlyq sektoryna ozyq tehnologııalardy engizýge yqpal etpek.
Qytaı men Ortalyq Azııa aýyl sharýashylyǵy salasyndaǵy yntymaqtastyqty keńeıtýde – Halyq gazeti
Qytaı men Ortalyq Azııa elderi aýyl sharýashylyǵy tehnologııalaryn engizý, sý resýrstaryn tıimdi paıdalaný jáne mamandar daıarlaý baǵytyndaǵy yntymaqtastyqty tereńdetip keledi.
Bul týraly osy aptada Qytaıdyń Halyq gazeti basylymy habarlady.
Qytaılyq BAQ-tyń málimetinshe, Qytaı mamandary Qazaqstannyń ońtústiginde sortań jerlerdi ıgerý jáne sý únemdeý tehnologııalaryn engizý arqyly júgeri ónimdiligin 20%-dan astam arttyryp, sý tutynýdy 30%-dan astam qysqartqan. Joba aıasynda 200-den astam jergilikti maman oqytylǵan. Qytaı tarapy Qyrǵyzstanda alma ósirý tehnologııalaryn jetildirýge, Tájikstanda tsıfrlyq aýyl sharýashylyǵy men ónim óńdeýdi damytýǵa da qoldaý kórsetýde. Sonymen qatar, 25 qazanda Qytaıdyń Shensı ólkesindegi ıAnlın qalasynda Shanhaı yntymaqtastyq uıymynyń aýyl sharýashylyǵy kórmesi ashyldy. 2019 jyldan beri munda 100-den astam oqytý kýrsy ótkizilip, 3 200-den astam maman biliktiligin arttyrǵan.
Sonymen qatar osy aptada Halyq gazeti basylymynda «Shyńjańnyń eki qurlyqtyq porty arqyly 15 myńnan astam júk poıyzy ótti» degen aqparat jaryq kórdi.
Atalǵan basylymnyń deregine súıensek, bıyl 23 qazandaǵy jaǵdaı boıynsha, Qytaıdyń Shyńjań óńirindegi Alashankoý men Qorǵas temirjol porttary arqyly Qytaı–Eýropa jáne Qytaı–Ortalyq Azııa baǵyttarynda 15 myńnan astam júk poıyzy qatynap, 30,58 mln tonna júk tasymaldandy.
Júk tasymalynyń ótkizý qabiletin arttyrý maqsatynda temirjol basqarmalary bir quramdaǵy vagon sanyn 50-den 55-ke, al poıyzdyń júk tasymaldaý kólemin 2 500 tonnadan 3 000 tonnaǵa deıin ulǵaıtty. Qazirgi ýaqytta Alashankoý porty Germanııa men Polshany qosa alǵanda, 21 elge baǵyttalǵan 130 júk baǵytyna qyzmet kórsetedi. Al Qorǵas porty 18 eldegi 46 qala men óńirdi baılanystyratyn 91 baǵyt boıynsha júk tasymalyn qamtamasyz etedi.
Qazvın – Sefevıdter dáýirindegi Irannyń tarıhı astanasy – ParsToday
Irannyń soltústik-batysynda ornalasqan Qazvın qalasy XVI ǵasyrdyń ortasynan bastap shamamen jarty ǵasyr boıy Sefevıdter memleketiniń astanasy boldy. Shah Tahmasp I astanany Osman ımperııasynyń shabýyldaryna jıi ushyraǵan Tebrızden Qazvınge kóshirdi. Qala óziniń strategııalyq ornalasýymen qatar, sáýlet jáne qala qurylysy salasyndaǵy jańashyldyqtarymen de erekshelendi, dep jazdy ParsToday aqparat agenttigi.
Irandyq BAQ-tyń dereginshe, munda saraılar, baqtar, aýlalar men ákimshilik ǵımarattardan turatyn keń patshalyq keshen qalyptasty. Onyń búginge deıin saqtalǵan mańyzdy nysandarynyń qatarynda Chehelsotýn pavılony men Álı Qapý qaqpasy bar. Al 1596–1597 jyldary Shah Abbas I astanany Isfahanǵa kóshirdi.
Qazvınniń Sefevıdter dáýirindegi eń mańyzdy sáýlettik erekshelikteriniń biri – qazirgi Sepah dańǵylyna sáıkes keletin Koroldik kóshe. Ol tek kólik qatynasyna arnalǵan jol emes, aǵashtar, sý arnalary men demalys oryndaryn biriktirgen kórkem qalalyq keńistik bolǵan. Zertteýshiler bul kósheni keıin Isfahanda salynǵan áıgili Chaharbaǵ dańǵylynyń mańyzdy izashary dep sanaıdy. Osylaısha, Qazvın Sefevıdter dáýirindegi sáýlet pen qala qurylysynyń qalyptasýynda mańyzdy ról atqaryp, keıin Isfahanda keńinen damyǵan arhıtektýralyq tujyrymdamalarǵa negiz boldy.
Erdoǵan: HHІ ǵasyr túrki áleminiń ǵasyry bolady – TRT
Túrkııa prezıdenti Rejep Taıyp Erdoǵan HHІ ǵasyr túrki áleminiń ǵasyry bolatynyna senim bildirdi. Bul týraly ol Túrki memleketteri uıymynyń (TMU) 13-shi sammıtine oraı jarııalaǵan «Túrki áleminiń ǵasyry: Yntymaqtastyqtan ıntegratsııaǵa» atty maqalasynda málimdedi. Maqala Qazaqstan, Ázerbaıjan, Qyrǵyzstan, Ózbekstan, Soltústik Kıpr Túrik Respýblıkasy, Túrikmenstan jáne Vengrııanyń jetekshi buqaralyq aqparat quraldarynda jaryq kórdi. Bul týraly osy aptada Túrkııa Radıo Televızııa portaly habarlady.
«TRT»-nyń dereginshe, maqalada Erdoǵan túrki memleketteri arasyndaǵy saıası, ekonomıkalyq, gýmanıtarlyq jáne mádenı yntymaqtastyqty nyǵaıtýdyń mańyzyn atap ótti. Onyń aıtýynsha, qazirgi halyqaralyq jaǵdaı túrki elderiniń birlesken is-qımylyn strategııalyq qajettilikke aınaldyrǵan. Sondaı-aq ol ekonomıkalyq ıntegratsııany damytýǵa, Kaspıı arqyly ótetin Shyǵys-Batys Orta dáliziniń áleýetin paıdalanýǵa, kólik-logıstıka baılanystaryn keńeıtýge jáne Soltústik Kıpr Túrik Respýblıkasynyń uıym aıasyndaǵy baılanystaryn nyǵaıtýǵa nazar aýdardy.
Túrkııa prezıdenti Ankarada ótetin sammıt túrki memleketteri arasyndaǵy yntymaqtastyqty jańa deńgeıge kóterip, uıymnyń halyqaralyq arenadaǵy yqpalyn arttyratynyna senim bildirdi. Ol ortaq tarıhı jáne mádenı qundylyqtarǵa súıene otyryp, baýyrlas elder arasyndaǵy birlikti naqty jetistiktermen nyǵaıtý jáne keler urpaqqa qýatty túrki álemin qaldyrý mańyzdy mindet ekenin atap ótti. «Prezıdent Erdoǵan maqalasyn myna sózdermen aıaqtady: «HHІ ǵasyrdyń «Túrki áleminiń ǵasyry» bolatynyna shyn júrekten senemin» dep jazdy túrkııalyq BAQ.
Sondaı-aq apta sońynda «TRT»-da «Túrkııa túrki álemimen yntymaqtastyqty tereńdetýge nıetti» degen taqyryptaǵy aqparat jarııalanǵanyn da aıta ketý kerek.
Atalǵan basylymnyń málimetinshe, Túrkııa Syrtqy ister mınıstri Hakan Fıdan Túrki memleketteri uıymy Syrtqy ister mınıstrleri keńesiniń otyrysy ózara yntymaqtastyqty nyǵaıtyp, ortaq maqsattarǵa qol jetkizýge yqpal etetinin málimdedi. Áleýmettik jelidegi jazbasynda ol tamyry tereń baýyrlastyq baılanystarǵa súıene otyryp, barlyq saladaǵy áriptestikti odan ári damytýǵa nıetti ekenin atap ótti. Sondaı-aq atqarylǵan jumystarǵa úles qosqan áriptesterine alǵys aıtyp, Túrkııa prezıdentiniń tóraǵalyǵymen ótetin sammıt túrki álemine ıgilik ákeletinine tilektestik bildirdi.
Ándijanda qazaqstandyq teatr ujymynyń «Jibek» spektakli kórsetildi – ÓzA
Ándijan qalasynda ótip jatqan IV TURKSOY halyqaralyq teatr festıvali aıasynda Babyr atyndaǵy oblystyq mýzykalyq drama teatrynyń sahnasynda qazaqstandyq teatr ujymynyń «Jibek» mýzykalyq spektakli kórermenge usynyldy.
Bul týraly osy aptada «ÓzA» aqparat agenttigi habarlady.
Ózbekstandyq BAQ-tyń dereginshe, qazaqtyń «Qyz Jibek» eposy negizinde sahnalanǵan qoıylymda Jibek pen Tólegenniń mahabbat hıkaıasy, adaldyq, ulttyq qundylyqtar men adam taǵdyry sýretteledi. Spektaklde qazaqtyń ulttyq mýzykasy men salt-dástúrleri zamanaýı teatrlyq sheshimdermen úılesim tapqan. Qoıylymnyń halyqaralyq festıval aıasynda kórsetilýi túrki halyqtarynyń mádenı murasyn nasıhattap, teatr óneri arqyly mádenı yntymaqtastyqty nyǵaıtýǵa baǵyttalǵan.
Sondaı-aq osy aptada «ÓzA»-da «Qazaqstan men Ózbekstan sport bilimi salasyndaǵy yntymaqtastyqty keńeıtedi» degen taqyryptaǵy aqparat jarııalandy.
Habarlamada aıtylýynsha, Ózbekstan memlekettik dene shynyqtyrý jáne sport ýnıversıteti men Abaı atyndaǵy Qazaq ulttyq pedagogıkalyq ýnıversıteti yntymaqtastyq týraly memorandýmǵa qol qoıdy. Qujat eki eldiń joǵary oqý oryndary arasyndaǵy baılanysty nyǵaıtýǵa, bilim men ǵylym salasyndaǵy áriptestikti damytýǵa baǵyttalǵan.
kezdesý barysynda professor-oqytýshylar quramynyń biliktiligin arttyrý, sheteldik taǵylymdamalar uıymdastyrý, birlesken ǵylymı zertteýler júrgizý, konferentsııalar men semınarlar ótkizý, jas zertteýshiler arasynda tájirıbe almasý máseleleri talqylandy. Ózbekstan ýnıversıtetiniń rektory R. Matkarımov pen Abaı ýnıversıtetiniń strategııa jáne halyqaralyq baılanystar jónindegi prorektory Aıgúl Iskakova memorandým professor-oqytýshylar almasýyna, ınnovatsııalyq jobalardy iske asyrýǵa jáne ǵylymı-praktıkalyq is-sharalardy birlesip uıymdastyrýǵa negiz bolatynyn atap ótti.
