Ándijan Túrki áleminiń mádenı astanasy mártebesin aldy
ASTANA.KAZINFORM — Jıyn barysynda Qazaqstan men Ózbekstan arasyndaǵy mádenı baılanystarǵa da erekshe nazar aýdaryldy.
Qazaqstan Ózbekstandaǵy Maqom óneriniń III halyqaralyq forýmyna qatysty.
Namangan qalasynda Maqom óneriniń III halyqaralyq forýmy aıasynda «Shyǵys maqomynyń jańa baǵyttary: dástúr men jańashyldyq sabaqtastyǵy» atty halyqaralyq ǵylymı-tájirıbelik konferentsııa ótti.
Forýmnyń ashylý rásimine Ózbekstan Respýblıkasynyń Prezıdenti Shavkat Mırzıeev qatysyp, jıyn qonaqtaryna arnap sóz sóıledi.
Konferentsııa jumysyna Qazaqstan Respýblıkasy Mádenıet jáne aqparat vıtse-mınıstri Aıbek Sydyqov qatysty.
Ol óz sózinde Memleket basshysy Qasym-Jomart Toqaevtyń mádenıetti damytýǵa, tarıhı murany saqtaýǵa jáne ulttyq qundylyqtardy qoldaýǵa erekshe mán beretinin atap ótti.
Vıtse-mınıstr maqom óneriniń Qazaqstannyń dástúrli mýzyka mádenıetimen úndesetinin atap ótti. Onyń aıtýynsha, kúı, jyr, terme, aıtys jáne dástúrli án óneri – ulttyń rýhanı murasy men mádenı sabaqtastyǵyn saqtap kele jatqan qundylyqtar.
Konferentsııa barysynda dástúrli ónerdi zamanaýı tehnologııalar dáýirinde saqtaý máselesi keńinen talqylandy. Qatysýshylar mádenı murany tsıfrlandyrý, jańa tehnologııalardyń múmkindikterin paıdalaný jáne jastardyń klassıkalyq mýzykaǵa qyzyǵýshylyǵyn arttyrý joldary jóninde pikir almasty.
Jıyn barysynda Qazaqstan men Ózbekstan arasyndaǵy mádenı baılanystarǵa da erekshe nazar aýdaryldy. Osy rette «Saltanat» memlekettik bı ansambliniń Hıýa qalasynda ótken III halyqaralyq «Lazgı» bı festıvaline qatysyp, «Eń úzdik sahnalanǵan bı» atalymyn ıelengeni aıtyldy. Sonymen qatar ózbekstandyq ónerpazdardyń Halyq qaharmany Roza Baǵlanova atyndaǵy halyqaralyq vokal baıqaýyna qatysqany atap ótildi. Baıqaý qorytyndysy boıynsha Mýhaddas Alıeva arnaıy júldege ıe boldy.
Forýmnyń aıtýly oqıǵalarynyń biri – Ándijannyń Túrki áleminiń mádenı astanasy atanýy boldy. Bul mártebe ótken jyly Aqtaý qalasyna berildi.
Forýmǵa ıÝNESKO, ISESKO, TMD, ShYU, Túrki memleketteri uıymy, TÚRKSOI, Túrki memleketteri Parlamenttik assambleıasy, Túrki mádenıeti jáne murasy qory, shet memleketterdiń mádenıet mınıstrlikteri, dıplomatııalyq korpýs ókilderi, mýzykatanýshylar, pedagogter jáne oryndaýshylar qatysty. Іs-sharaǵa álemniń 80-nen astam elinen 250-ge jýyq mádenıet jáne óner qaıratkeri jınaldy.
Konferentsııa alańynda 60-qa jýyq elden kelgen 100-den astam ǵalym men maman bas qosty. Baǵdarlamaǵa 121 ǵylymı eńbek engizildi.
Aıta ketelik Túrki áleminiń ortaq álipbıi: Astanada qazaq jáne qyrǵyz áripteriniń úlgisi tanystyrylǵan edi.
