Ańdý, jol apatyn ádeıi uıymdastyrý jáne adam urlaý: sotta Kolesnıkov isiniń jańa mán-jaılary aıtyldy

Sot protsesi memlekettik tilde sýdıa Abınýr Qarabaevtyń tóraǵalyǵymen ótti. Memlekettik aıyptaýdy prokýror Muhtar Arystanov qoldady. Qaza tapqan Vasılıı Kolesnıkovtyń ákesi Aleksandr Kolesnıkovtyń múddesin advokattar Talǵat Esimov pen Vıktor Krıvonosov qorǵaıdy. Alty sottalýshynyń qorǵaýshylary — Saparymbetov, Musahanov, Jaqsylyq jáne Azadov.

Aldyn ala tyńdaýǵa alty sottalýshy kúzetpen jetkizildi. Olar — Maqsut Arysbaev, Raýan Inkarbekov, Darhan Qyzbalaev, Bekasyl Jumanazar, Álıhan Erimbet jáne Jandilda Qýandyqov. Olardyń beseýi buryn sottalǵan. Barlyǵy qamaýda otyr. Іs boıynsha taǵy bir kúdikti Marat Daýlasovqa izdeý jarııalanǵan. Tergeý materıaldarynda «Baha» degen atpen belgili taǵy bir yqtımal sybaılastyń jeke basy ázirge anyqtalmaǵan.

Alty sottalýshyǵa aýyr jáne asa aýyr qylmystar jasady degen aıyp taǵylyp otyr. Atap aıtqanda:

• aldyn ala sóz baılasqan adamdar toby jasaǵan, pyshaq qoldanylǵan buzaqylyq — QR QK 293-babynyń 3-bóligi;
• buzaqylyq nıetpen adamdar toby jasaǵan Maqsat Kóshkenbaevty óltirýge oqtalý — QR QK 24-babynyń 3-bóligi, 99-baby 2-bóliginiń 7 jáne 9-tarmaqtary;
• ómirge qaýipti kúsh qoldaný jáne qarý retinde paıdalanylǵan zattardy qoldaný arqyly adamdar toby jasaǵan Vasılıı Kolesnıkovty urlaý — QR QK 125-baby 2-bóliginiń 1, 3 jáne 4-tarmaqtary;
• adamdar toby jasaǵan, asa qatygezdikpen, buzaqylyq nıetpen jáne adam urlaýmen ushtasqan Vasılıı Kolesnıkovty óltirý — QR QK 99-baby 2-bóliginiń 3, 5, 7, 9 jáne 11-tarmaqtary. Osy áreketter QR QK-niń tıisti baptary boıynsha saralanǵan.

Sottalýshylardyń qorǵaýshylary olardyń kámeletke tolmaǵan balalary bar ekenin alǵa tartyp, BAQ ókilderiniń protseske qatysýyna, sondaı-aq foto jáne beınetúsirilim jasaýǵa tyıym salýdy surady. Sýdıa istiń qoǵamdyq rezonansyn eskerip, protsesti jabyq ótkizý týraly ótinishti qanaǵattandyrmady. Alaıda sottalýshylardyń, olardyń advokattarynyń jáne beınetúsirilimge resmı túrde qarsylyq bildirgen kýálardyń bet-beınesin túsirýge tyıym saldy.

Aıyptaý nusqasy: jábirlenýshilerdi ańdý, ádeıi jol apatyn uıymdastyrý jáne Kolesnıkovty urlaý

Aldyn ala tyńdaý barysynda prokýror Muhtar Arystanov aıyptaý aktisin jarııalady.

Qylmystyq is materıaldaryna sáıkes, 20 qańtardaǵy oqıǵaǵa deıin 2026 jylǵy 4 qańtarda Shymkent — Samara tasjolynyń Temirlan aýyly mańynda janjal bolǵan. Memlekettik aıyptaýdyń málimetinshe, Arysbaev, Qyzbalaev jáne olardyń tanysy otyrǵan Toyota Land Cruiser kóligin birneshe mashına qýyp, ondaǵy adamdar belgisiz qarýdan oq atqan. Saldarynan jol talǵamaıtyn kólik zaqymdanǵan. Osy fakti boıynsha keıin QR QK 293-babynyń 3-bóligi boıynsha jeke tergeý bastalǵan.

Tergeý nusqasy boıynsha, osy oqıǵadan keıin Arysbaev pen Qyzbalaev janjalǵa qatysýshylardan nemese olardyń jaqyn tanystarynan kek alýdy kózdegen. Aıyptaý tarapynyń málimetinshe, Vasılıı Kolesnıkov Oljas Sahımov pen Maqsat Beısenovtiń jaqyn dosy bolǵan. Tergeý olardy 4 qańtardaǵy janjalǵa qatysy bar adamdar retinde qarastyrǵan.

Aıyptaý málimetine sáıkes, 19 qańtarda birneshe adam Shymkenttegi páterlerdiń birine jınalyp, Vasılıı Kolesnıkovty óltirý josparyn qurǵan. Kelesi kúni olar meshit mańynda kezdesken. Tergeý materıaldary boıynsha, keıbiriniń janynda pyshaq pen tapansha bolǵan jáne betperde alyp júrgen.

20 qańtarda tústen keıin birneshe adam úsh kólikpen Vasılıı Kolesnıkov, Maqsat Kóshkenbaev jáne Nurmahan Eshanqulov otyrǵan Hyundai Sonata kóligin ańdyǵan. Saǵat 15:39–da Erimbetov pen Rysqulov kósheleriniń qıylysynda Toyota Camry kóligi baǵdarshamnyń qyzyl túsine toqtaǵan Hyundai Sonata-ǵa ádeıi soǵylǵan. Osydan keıin jappaı tóbeles bastalǵan.

Tergeý málimetinshe, shabýyl kezinde Maqsat Kóshkenbaevtyń arqasyna pyshaq suǵyp, basy men denesine birneshe ret soqqy jasalǵan. Shabýyldan qashyp shyqqan Kóshkenbaevty Nurmahan Eshanqulov aýrýhanaǵa jetkizgen. Dárigerler oǵan shuǵyl ota jasaǵan.

Sot-medıtsınalyq saraptama Kóshkenbaevtyń keýde tusyna pyshaq tıgenin, qabyrǵaaralyq arterııasy men qabyrǵalary zaqymdanǵanyn anyqtaǵan. Jaraqat densaýlyqqa aýyr zııan retinde baǵalanǵan. Aıyptaý tarapy er adamdy óltirý nıeti der kezinde kórsetilgen medıtsınalyq kómektiń arqasynda iske aspady dep esepteıdi.

Sol ýaqytta tergeý nusqasy boıynsha, Vasılıı Kolesnıkovty uryp-soǵyp, kúshpen Toyota Camry kóligine otyrǵyzǵan. Ol qarsylyq kórsetip, kólikten shyǵýǵa tyrysqan. Nurmahan Eshanqulov ony alyp ketýge kedergi jasaý maqsatynda kóliktiń dóńgelegin pyshaqpen tesken. Keıin Kolesnıkovty VAZ-21014 kóligine otyrǵyzyp, Túrkistan oblysy Ordabasy aýdanynyń Qaınar aýylyna alyp ketken. Aıyptaý nusqasyna sáıkes, jol boıynda ony uryp-soǵý jalǵasqan. Tergeý málimetinshe, Kolesnıkovtyń basyna, denesine, qoly men aıaqtaryna uzaq ýaqyt boıy doǵal jáne ótkir zattarmen soqqy jasalǵan. Alǵan jaraqattarynyń saldarynan er adam qaıtys bolǵan.

Sot-medıtsınalyq saraptama nátıjesinde marqumnyń kóptegen qabyrǵasy men aıaq-qoldary synǵany, jabyq bas-mı jaraqaty, keýde qýysynyń jaraqaty jáne pyshaq jaraqattary bolǵany anyqtalǵan. Ólimge deneniń kóptegen súıek zaqymdanýymen asqynǵan aralas doǵal jaraqaty jáne odan týyndaǵan travmatıkalyq shok sebep bolǵan. Kolesnıkovtyń denesin Temirlan aýylyndaǵy ortalyq aýdandyq aýrýhanaǵa jetkizip, avtoturaqqa tastap ketken. Keıin olar oqıǵa ornynan boı tasalaǵan.

Bul turmystyq janjal: Arysbaevtyń qorǵaý tarapy

Sottalýshy Arysbaevtyń advokaty Tofık Azadov sotqa qorǵaý aktisin usynyp, óz qorǵaýyndaǵy azamatqa adam óltirý, adam óltirýge oqtalý jáne adam urlaý baptary boıynsha taǵylǵan aıyppen kelispeıtinin málimdedi.

Qorǵaý tarapynyń pikirinshe, is materıaldarynda Arysbaevtyń Vasılıı Kolesnıkovty óltirýge tikeleı nıeti bolǵanyn, aldyn ala sóz baılasýǵa jáne jábirlenýshini urlaýǵa qatysqanyn, sondaı-aq onyń ólimine ákelgen dene jaraqattaryn salǵanyn dáleldeıtin jetkilikti aıǵaq joq.

— Meniń qorǵaýymdaǵy adamnyń aıtýynsha, Marat jáne Baha esimdi adamdar Vasılıı Kolesnıkovpen sóılesýge bara jatqanyn aıtyp, ony birge barýǵa shaqyrǵan. Arysbaev olardyń maqsatyn bilmegen. Jol apatynan keıin turmystyq sıpattaǵy janjal týyndap, tóbeleske ulasqan. Arysbaevtyń naqty róli anyqtalmaǵan, tergeý barlyq qatysýshylardyń áreketin jeke-jeke saralamaǵan, — dedi Tofık Azadov.

Advokat sondaı-aq Arysbaevtyń buǵan deıin Vasılıı Kolesnıkovty, Maqsat Kóshkenbaevty jáne Nurmahan Eshanqulovty tanymaıtynyn, olarmen jeke arazdyǵy bolmaǵanyn atap ótti. Qorǵaý tarapynyń aıtýynsha, sottalýshynyń janynda qarý bolmaǵan jáne tergeý barysynda oǵan qatysty tıisti zattaı dálelder tabylmaǵan.

— Jábirlenýshiniń árbir jaraqatyn kim, qandaı zatpen jáne qandaı jaǵdaıda salǵany anyqtalmaǵan. Arysbaevtyń áreketi men jábirlenýshiniń ólimi arasynda tikeleı sebep-saldarlyq baılanys ta dáleldenbegen, — dedi qorǵaýshy.

Azadov sottan Arysbaevty adam óltirý, adam óltirýge oqtalý jáne adam urlaý aıyptary boıynsha aqtaýdy, al onyń áreketin buzaqylyq jáne ózinshe bılik etý baptary boıynsha saralaýdy usyndy. Sot bul ýájderge isti máni boıynsha qaraý kezinde baǵa beredi.

Kolesnıkov sportshy bolǵan jáne UQT quramynda turmaǵan — advokat

Jábirlenýshi taraptyń advokaty Talǵat Esimov Vasılıı Kolesnıkovtyń sportpen aınalysqanyn jáne uıymdasqan qylmystyq toptyń múshesi retinde esepte turmaǵanyn aıtty.

Onyń aıtýynsha, Kolesnıkov kámeletke tolmaǵan kezinde jasaǵan qylmysy úshin sottalǵan, alaıda onyń sottylyǵy ótelgen.

Jábirlenýshi taraptyń ókili jalpy alǵanda sotqa deıingi tergeýdiń nátıjelerine qanaǵattanatynyn aıtty. Onyń sózinshe, is qalalyq prokýratýranyń, Іshki ister mınıstrliginiń jáne Prezıdent Ákimshiliginiń baqylaýynda bolǵan.

— Sotqa deıingi tergeý obektıvti júrgizildi. Bastapqyda basqa da adamdardy jaýapkershilikke tartý qajet degen kúdik bolǵan, alaıda ol rastalmady. Qazir eki adam anyqtalýy tıis. Onyń biri izdeýde, ekinshisiniń jeke basy ázirge belgisiz. Olardyń kim ekenin anyqtaý — ýaqyttyń enshisinde, — dedi Talǵat Esimov.

Advokattyń aıtýynsha, alty sottalýshyǵa taǵylǵan aıyp adam urlaý, asa qatygezdikpen jasalǵan, adamdar toby jasaǵan jáne adam urlaýmen ushtasqan kisi óltirý, adam óltirýge oqtalý jáne buzaqylyq faktilerin qamtıdy.

Sonymen qatar advokat Shymkent qalasy polıtsııasynyń Jedel basqarý ortalyǵy qyzmetkerleriniń áreketin synǵa aldy. Onyń aıtýynsha, shabýyl adam kóp júretin qıylysta birneshe mınýtqa sozylǵanymen, quqyq qorǵaý organdary der kezinde áreket etpegen.

— Tóbeles alty-jeti mınýtqa sozyldy. Kolesnıkov sportshy bolǵan, Eshanqulov ta qarsylyq kórsetken. Maqsat Kóshkenbaevtyń da qaza tabýy múmkin edi, ony Nurmahan Eshanqulov qutqardy. Meniń oıymsha, polıtsııa tarapynan áreketsizdikke jol berildi. Eger der kezinde «Ustaý» jospary engizilip, qıylystar jabylǵanda, Kolesnıkov tiri qalar edi, — dedi Talǵat Esimov.

Advokattyń aıtýynsha, oqıǵadan keıin polıtsııa qyzmettik tekserý júrgizgen. Keıbir qyzmetkerler jumystan shyǵarylyp, basqalaryna sógis jarııalanǵan.

Negizgi sot protsesi qashan bastalady

Aldyn ala tyńdaý qorytyndysy boıynsha tóraǵalyq etýshi sýdıa Abınýr Qarabaev negizgi sot talqylaýyn 7 qyrkúıek kúni saǵat 10:00–ge belgiledi.

Sot otyrystaryn aptasyna eki ret — dúısenbi jáne seısenbi kúnderi ótkizý josparlanǵan. Protsess ashyq túrde ótedi, alaıda onlaın-translıatsııa bolmaıdy. Sottalýshylardyń kinási zańdy kúshine engen sot úkimimen ǵana belgilenýi múmkin.

Eske sala keteıik, qylmys 20 qańtar kúni túste Erimbetov pen Rysqulov kósheleriniń qıylysynda bolǵan. Eki kólik soqtyǵysqannan keıin jappaı tóbeles bastalyp, Maqsat Kóshkenbaev aýyr jaraqattanǵan. Vasılıı Kolesnıkovty kúshpen qala syrtyna alyp ketken. Keıin onyń denesi Túrkistan oblysy Ordabasy aýdanyndaǵy aýrýhana mańynan tabylǵan. 

Shymkenttegi jol ortasyndaǵy tóbeleske qatysty úsh qylmystyq is qozǵaldy.