Andreı Skabelka «Barys» komandasynyń bas bapkeri qyzmetinen ketti
Andreı Skabelka «Barys» komandasynyń bas bapkeri qyzmetinen ketti, dep habarlaıdy QazAqparat tilshisi.
Bul jóninde komandanyń baspasóz qyzmeti málim etti.
Belarýstik maman aldymen 2018-2020 jyldarda basshylyq jasap, eki márte "Barysty" Gagarın kýbogynyń pleı-off satysyna alyp shyqty.
Sondaı-aq, ol 2022/23 jylǵy maýsymda da komandaǵa jetekshilik jasady.
«Barys» komandasy bas bapkeriniń mindetin atqarýshy bolyp Ǵalym Mámbetalıev taǵaıyndaldy. Ol komanda qurylymynda 2009 jyldan beri jemisti eńbek etip keledi. 2023 jyly onyń jetekshiligimen elimizdiń stýdentter quramasy Búkilálemdik qysqy Ýnıversıadada qola júldeger atandy. Al «Nomad» komandasy Qazaqstan birinshiliginiń altynyn jeńip aldy.
Onyń jetekishiligimen elimizdiń ulttyq quramasy elıtalyq dıvızıondaǵy ornyn saqtap qaldy.
Eske salsaq, Ǵalym Mámbetalıev 2023-2024 jylǵy maýsymda shaıbaly hokkeıden Qazaqstan ulttyq quramasynyń bas bapkeri qyzmetin atqarady.