Andreı Lýkın ormandy qorǵaý zańnamasyn qatańdatýdy usyndy
NUR-SULTAN. QazAqparat - Senator Andreı Lýkın jasyl jelekti kesýdi zań júzinde retteýdegi olqylyqtar týraly aıtty, dep habarlaıdy QazAqparat tilshisi.
Depýtat vıtse-premer Roman Sklıardyń atyna joldaǵan depýtattyq saýalynda osy saladaǵy zańnamany jetildirý qajettigi týraly másele kóterdi.
Andreı Lýkın sońǵy birneshe jylda buqaralyq aqparat quraldarynda jappaı zańsyz aǵash kesý týraly aqparat jıi paıda bola bastaǵanyn atap ótti.
2020 jyly Almaty qalasynda Qyzyl kitapqa engen emen aǵashtarynyń kesilýi, Shymkent qalasynda avtojoldardyń qurylysy kezinde ruqsatsyz jáne ótemaqysyz 2 myńnan astam aǵash pen tal-butanyń otalýy jurtshylyq arasynda ashý-yza týǵyzǵan bolatyn. Orman kodeksindegi qoldanystaǵy erejeler aǵashtar men butalardy kesilýden jetkilikti túrde qorǵaı almaıdy.
«Erejelerdi buzǵany nemese aǵashtar men butalardy zańsyz keskeni, joıǵany nemese zaqymdaǵany úshin ákimshilik jaýapkershilik qarastyrylǵan. Adamdardy ákimshilik jaýapkershilikke tartý úshin kelgen zalaldy anyqtaý qajet. Bul rette, zalaldy esepteý úshin ýákiletti organ belgilenbegen jáne zalaldy anyqtaý ádistemesi jasalmaǵan, sondyqtan kináli adamdar jazasyz qalyp otyr», - dedi Andreı Lýkın.
Senator osyǵan baılanysty zańnamany jetildirý máselesine Mınıstrler kabıneti músheleriniń nazaryn aýdaryp, Qyzyl kitapqa engen aǵashtardy kesýge ruqsat berýdi erejelerden alyp tastaýdy surady.
