Andreı Lýkın elimizdegi lombardtar talaptardy oryndamaı otyrǵanyn aıtty
Osyǵan oraı depýtat Qarjy naryǵyn retteý jáne damytý agenttigine saýal joldap, qazirgi tańda lombardtar óz jumysyn bastaǵany týraly memlekettik organdarǵa eskertpeýge quqyly ekenin atap ótti. Bul olardyń qyzmeti Agenttik tarapynan baqylanyp, rettelmeıdi degen sóz. Osyndaı lombardtardy tekserý múmkindiginiń joqtyǵyna baılanysty olarǵa qatysty qandaıda bir ákimshilik shara qoldaný múmkin emes.
Sonymen qatar senator mundaı qarjy uıymdarynyń qyzmetine baqylaý júrgizýge mindetti keıbir memlekettik organdar esh is-áreket jasamaı otyrǵanyn da tilge tıek etti.
Sondyqtan Andreı Lýkın mıkroqarjy uıymdarynyń qyzmetin baqylaý úshin biryńǵaı aqparattyq júıe qalyptastyrýdyń mańyzy zor dep esepteıdi. Sondaı-aq, kepilge qoıylǵan múlikti onyń ıesine avtomatty túrde eskerte otyryp, jarııa saýda ótkizetin platforma qajet. Tirkelmegen barlyq lombard zańdy túrde qaıtadan qurylýǵa nemese múldem jabylýǵa tıis. Odan bólek, depýtattyq saýalda zaım bergen kezdegi komıssııa kólemin reglamentteýge jáne qaýipsizdik pen tehnıkalyq jabdyqtaýǵa qoıylatyn talaptarǵa qatysty zańnamalardy jetildirýdiń mańyzdy ekeni aıtyldy.