Andreı Lýkın: Astyq kontrabandasy saldarynan elimizdiń bıýdjetine júzdegen mıllıon teńge túspeı qaldy
Bul týraly Qarjy mınıstri Erulan Jamaýbaeevtyń atyna saýal joldaǵan senator Andreı Lýkın aıtty, dep habarlaıdy QazAqparat tilshisi.
Senatordyń málimetinshe, elimizde jalǵan qujat boıynsha Reseıden Qazaqstanǵa bıdaıdy salyq tólemeı zańsyz ákelýdiń turaqty joldary bar. Onyń ústine, bul astyqty EAEO-dan tys jerlerge eksporttaǵany úshin kásipkerler odan keıin de Qazaqstan bıýdjetinen tólemder alyp otyr.
«2019 jyldan bastap qazirgi ýaqytqa deıin Reseıden SQO aýmaǵyna 450 myń tonnadan astam bıdaı ákelingen, olar Qazaqstannyń aýyl sharýashylyǵy taýaryn óndirýshileriniń ilespe qujattary boıynsha astyq qabyldaý pýnktterine tapsyrylǵan. Qujattamalyq rásimnen keıin treıderler ol ónimdi qazaqstandyq taýar retinde elden tysqary jerge eksporttady. Bul bıýdjet qarjysy esebinen qosymsha qun salyǵyn eksporttaýshylarǵa zańsyz qaıtaryp berýge ákep soqtyrdy. Quqyq qorǵaý organdary jalǵan qujattar boıynsha bıdaıdy zańsyz ákelý shemasyn rastap otyr. Reseıden Qazaqstanǵa ákelingen taýardan tólenbegen qosymsha qun salyǵy túrindegi memleketke aldyn ala kelgen zalal 660 mln teńgeden asty», - dedi Andreı Lýkın Senattyń jalpy otyrysynda.
Depýtattyń aıtýynsha, mundaı jaǵdaıdyń sebebi – Reseıden ákelinetin astyq ónimderin paıdalanýdy esepke alý jáne odan ári baqylaý júıesiniń bolmaýy. Sonymen qatar, ekonomıkalyq kontrabanda máselesi ony durys anyqtaý turǵysynda asa mańyzdy bolyp otyr.
«Qylmystyq zańnamada bir qylmystyq nıet úshin qylmystyq quqyq buzýshylyqtyń eki túri kózdelip otyr. Eger bireýinde taýardy tárkilesek, ekinshisinde - qajetti tólemderdi tólegennen keıin taýardy qaıtarýǵa týra keledi. Joǵarǵy Sottyń normatıvtik qaýlysynda da osy qylmystyq quqyq buzýshylyqtar belgileriniń naqty aıyrmashylyǵy joq. Nátıjesinde, Jetisý oblysynda ekonomıkalyq kontrabandanyń qylmystyq quramyn ár túrli túsine bastady. TNVED kodyn durys kórsetpegeni úshin bireýdi kontrabandıst dep tanıdy, ekinshisin «jaltarǵany» úshin aıyptaıdy. Mundaı jaǵdaılarda kontrabandany jaltarýdan ajyratýǵa baǵyttalǵan túzetýler engizý arqyly osy jaǵdaıǵa zańnamalyq aralasýdyń shuǵyl qajettigi týyndap otyr», - dedi senator.
Senator osyǵan baılanysty Úkimet múshelerine «kontrabanda» jáne «jaltarý» qylmystyq quqyq buzýshylyq belgilerin ajyratýdy, EAEO elderinen ákelinetin taýarlardy esepke alý jáne baqylaý protsesin tsıfrlandyrýdy, sondaı-aq taýarlardy kóleńkeli áketýdiń jolyn kesý jumysyn kúsheıtýdi usyndy.
