Andreı Kortýnov álemdik ujymdyq qaýipsizdikti qurýdaǵy úsh problemany atady

NUR-SULTAN. QazAqparat – Álemdik ujymdyq qaýipsizdik qurýǵa kedergi keltiretin 3 negizgi problema bar. Bul týraly Astana klýbynyń 6-otyrysynda Reseı halyqaralyq ister jónindegi keńesiniń bas dırektory Andreı Kortýnov aıtty, dep habarlaıdy QazAqparat tilshisi.

«Biz álemdik ujymdyq qaýipsizdik qurý baǵytynda oılanyp ta otyrǵan joqpyz. Menińshe, onyń negizgi úsh problemasy bar jáne ol kedergi keltirip otyr. Birinshiden, bizdiń aldymyzda turǵan ortaq kúntártibi joq. Halyqaralyq júıe evolıýtsııasynyń baǵyttary aıqyndalmaǵan. Zańdy ne zańsyz, durys ne burys degen sııaqty tujyrymdamalar óte kómeski. ıAǵnı, ortaq ustanym bolmasa, onda ujymdyq qaýipsizdik qurý, onyń tujyrymdamasyn ázirleý múmkin emes», - dedi ol.

Onyń atap ótýinshe, ekinshi problema memleketterdiń arasynda senim joq. Demek, memleketter, ásirese iri derjavalar bir-birine senbeıdi. Al bul ujymdyq qaýipsizdikke barar joldaǵy úlken kedergi sanalady.

«Óıtkeni, ujymdyq qaýipsizdikke qol jetkizý úshin memleketter ózderine belgili bir mindettemeler alýy kerek jáne ol mindettemelerdi oryndaý úshin bir-birine senýi qajet. Basqa taraptyń da sol mindettemeni oryndaıtyndyǵyna kózi jetýi tıis. Úshinshi problema, bizde ınstıtýttar turǵysynan belgili bir deńgeıdegi shashyrańqylyq baıqalady. Halyqaralyq, óńirlik, álemdik deńgeıdegi ınstıtýttarda úlken bıýrokratııaǵa negizdelgen satylar bar. Memleketter de mundaı agenttikterge, halyqaralyq uıymdarǵa kúmánmen qaraıdy. Demek, bul ınstıtýttar qoǵam senimin aqtaı almady», - dedi Andreı Kortýnov.