Andreı Karpovıch «Qyzyljar» klýbynyń bas bapkeri qyzmetinen ketti
NUR-SULTAN. QazAqparat – Qazaqstandyq maman Andreı Karpovıch fýtboldan Qazaqstan chempıonatynyń premer-lıgasynda óner kórsetetin «Qyzyljar» klýbynyń bas bapkeri qyzmetinen ketti, dep habarlaıdy QazAqparat tilshisi.
A.Karpovıchtiń Instagramdaǵy paraqshasynda málim etkenindeı, bul sheshimdi ol óz erkimen qabyldaǵan.
«Ótken jylǵy maýsym biz úshin tamasha ári qyzyqty boldy. Biz Qazaqstan atynan Konferentsııa lıgasynda óner kórsetýge joldama aldyq. Jigitterimiz el namysyn abyroımen qorǵaıdy dep úmittenemin jáne senemin. Bul – jaqsy da myqty komanda, tek sáttilik kerek. Múmkin, meniń ketýim «Qyzyljarǵa» sáttilik ákeletin shyǵar. Bul tek meniń sheshimim ekendigine taǵy da nazar aýdarǵym keledi. Klýb basshylyǵymen biz dos bolyp qalamyz. Osy kezeńde qoldaý kórsetken basshylyqqa, ákimdikke, oıynshylar men qyzmetkerlerge, bapkerler men jankúıerlerge rızashylyǵymdy bildiremin. Men qashanda «Qyzyljarǵa» jankúıermin. Bárine úlken rahmet!», dep jazdy A.Karpovıch.
«Qyzyljar» el birinshiliginde segiz týrdan keıin 13-orynda keledi.
Ótken aıda A.Karpovıchtiń eki matchta Qazaqstan ulttyq quramasyn da jattyqtyrǵany belgili.
Eske sala keteıik, budan buryn «Aqtóbe» fýtbol klýbynyń bas bapkeri qyzmetinen ketkenin jazǵan bolatynbyz.
