Andreı Karpovıch «Elimaıdyń» bas bapkeri qyzmetine kiristi

Qazaqstandyq maman Andreı Karpovıch «Elimaıdyń» bas bapkeri bolyp taǵaıyndaldy. Bul jóninde semeılik klýbtyń baspasóz qyzmeti málim etti, dep habarlaıdy Kazinform.

«Elimaı» fýtbol klýby Andreı Vladımırovıch Karpovıchpen kelisim-shart jasasqanyn resmı habarlaıdy.

Andreı Karpovıch - «Elimaıdyń» túlegi. Ol 1998-2000 jyldary semeılik klýbtyń namysyn qorǵap, el chempıony atandy.

Odan buryn ol «Qaıratta» bas bapkerdiń mindetin atqarýshy, «Oqjetpes» pen «Qyzyljarda» bas bapker boldy.

Sondaı-aq, 2022 jyly el quramasynyń Moldovaǵa qarsy eki oıynynda bas bapker mindetin atqardy.

Andreı Karpovıch fýtbolshylyq mansabynda 1998-2016 jyldar aralyǵynda elimizdiń birqatar klýby men Reseıdiń «Rostov», «Dınamo» komandalarynyń jeıdesin kıdi.

Eske salsaq, ol jaqynda «Aqtóbe» komandasynyń bas bapkeri qyzmetinen ketti.

Ol 2022 jyldan beri aqtóbelik klýbtyń tizginin ustaǵan edi.