Andreı Goreglıadtyń 1 jyl buryn úzilip qalǵan qoly áli bitken joq
ASTANA. QazAqparat - Osydan bir jyl buryn óndiris ornynda bolǵan oqys oqıǵa saldarynan qoly úzilip ketken Andreı Goreglıadtyń júıke talshyqtaryn qaıta qalpyna keltirý boıynsha ota áli kúnge deıin jasalmaǵan.
Pavlodar qalalyq №1 aýrýhananyń hırýrgi Sábıt Júsipovtiń aıtýynsha, jas jigittiń qol súıegi tolyq bitpegen, dep habarlaıdy pavlodarnews.kz.
«Andreı qazir bizdiń aýrýhananyń baqylaýynda. Synyǵyn tańǵyzý úshin kelip júr. Oǵan endi júıke talshyqtaryn qalpyna keltirý boıynsha ota dál qashan jáne qaıda jasalatyny týraly eshnárse aıta almaımyz. Negizi biz bul otany erterek jasaýdy josparlaǵan bolatynbyz. Biraq súıek ýaqytynda tez bitip ketedi dep oılaǵan edik. Alaıda onyń súıeginde tesik baryn jazda baıqadyq. Sonyń saldarynan osteomelıt tarap ketken. Aldaǵy ýaqytta otanyń kelesi satysyn josparlaıtyn bolamyz» - deıdi Sábıt Júsipov.
Eske sala keteıik, osydan bir jyldan astam ýaqyt buryn, ıaǵnı qazan aıynyń 7-sinde Andreı Goreglıad jumys ornyndaǵy konveıerlik taspany qozǵaltý barysynda qulap jaraqat alǵan bolatyn. Bes saǵatqa sozylǵan kúrdeli ota nátıjesinde ıyq súıegi, tamyrlary jáne sińirleri men bulshyq eti qalpyna keldi. Budan ári jas jigit fızıoemdeý kýrsynan ótip, júıke talshyqtaryn qalpyna keltirý otasyn jasatý kerek bolǵan.
