Andreı Golýbev Slovakııadaǵy jarystyń jartylaı fınalyna ótti

Qazaqstandyq Andreı Golýbev juptyq synda Slovakııa astanasy Bratıslavadaǵy chellendjer jarysynyń jartylaı fınalyna shyqty, dep habarlaıdy Kazinform.

Dodanyń 3-raketkasy bolyp tirkelgen A.Golýbev ýkraınalyq Denıs Molchanovpen birge eki kezdesýin sátti aıaqtady.

Qazaqstandyq-ýkraınalyq dýet aldymen grekııalyq Petros Tsıtsıpas – nıderlandylyq Sem Verbıkten 7:6 (7:2), 6:4 esebimen basym tústi.

Ekinshi match odan da tartysty bolyp, 2 saǵat 10 mınýtqa sozyldy. Golýbev – Molchanov belorýssııalyq Ivan Lıýtarevıch – ýkraınalyq Vladıslav Manafovty 6:7 (7:9), 7:6 (7:3), 17:15 esebimen joldan taıdyrdy.

Qazaqstandyq-ýkraınalyq jup bul báseke barysynda 8 eıs jasap, 5 breık-poınttyń ekeýin óz esepterine jazdy. Olardyń jartylaı fınaldaǵy qarsylastary keıin anyqtalady.

Eske sala keteıik, budan buryn Denıs Evseevtiń Qytaıdaǵy týrnırdiń 1/8 fınalyna shyqqanyn jazǵan bolatynbyz.