Andreı Golýbev Germanııadaǵy týrnırdiń fınalyna shyǵa almady

ASTANA. QazAqparat – Qazaqstandyq Andreı Golýbev Germanııanyń Haılbronn qalasynda ótip jatqan chellendjer jarysynyń fınalyna shyǵa almady, dep habarlaıdy QazAqparat tilshisi.

Týrnırdiń 4-raketkasy bolyp tirkelgen qazaqstandyq tennısshi men ýkraınalyq Denıs Molchanov jartylaı fınalda germanııalyqtar Konstantın Frantsen – Hendrık Iebenspen oınady.

Birinshi partııada kort ıeleri 6:4 esebimen basym tústi.

Frantsen men Iebens ekinshi sette taı-breıkte ábjildik tanytty – 7:6 (7:3).

Saǵat jarymdaı ýaqytqa sozylǵan báseke barysynda Golýbev pen Molchanov 2 breık-poınttyń bireýin paıdalandy. Qarsylastary 2 eıs, 2 breıkpen (9 breık-poınt) kózge tústi.

Osylaısha, A.Golýbev pen D.Molchanov fınalǵa bir qadam jetpeı toqtady.

Eske sala keteıik, budan buryn Rolan Garros týrnırinde áıelder arasynda fınalǵa shyqqan tennısshiler anyqtalǵanyn jazǵan edik.

Sondaı-aq Arýjan Saǵyndyqov Taılandtaǵy týrnırdiń jartylaı fınalyna shyqty.