Andreı Golýbev Aýstrııadaǵy jarystyń jeńimpazy atandy

ASTANA. QazAqparat – Qazaqstandyq Andreı Golýbev juptyq synda Zaltsbýrg (Aýstrııa) chellendjer týrnıriniń jeńimpazy atandy, dep habarlaıdy QazAqparat tilshisi.

Qazaqstandyq tennısshi ýkraınalyq Denıs Molchanovpen birge fınalda úndistandyqtar Anırýd Sandrasekar – Vıdjaı Sýndar Prashantpen chempıondyq ataqqa talasty.

Birinshi partııada qazaqstandyq-ýkraınalyq jup 6:4 esebimen basym tústi. Sodan keıin ekinshi sette taı-breıkte jeńisti julyp aldy – 7:6 (10:8).

Saǵat jarymnan astam ýaqytqa sozylǵan matchta A.Golýbev pen D.Molchanov 4 eıspen birge 2 breık-poınttyń bireýin paıdalandy. Qarsylastary 1 eıspen shekteldi.

Eske sala keteıik, budan buryn Andreı Golýbevtiń juptyq synda Aýstrııadaǵy týrnırdiń fınalyna shyqqanyn jazǵan bolatynbyz.

Sondaı-aq 15 jasar Zara Dárken alǵash ret WTA 250 týrnırinde oınaıdy.

Novak Djokovıch toǵyzynshy ret Ýımbldon fınalyna shyǵyp, rekord ornatty.