Andreı Ferapontov «Qaısardyń» bas bapkeri boldy

ASTANA. KAZINFORM - «Qaısar» fýtbol klýbyn aldaǵy jyly qazaqstandyq Andreı Ferapontov jattyqtyrady.

Tájirıbeli maman Premer-lıgada ózindik qoltańbasyn qaldyrǵan. Ol bas bapker laýazymyn «Maqtaaral» fýtbol klýbynda bastap, «Oqjetpes» komandasynda jalǵastyrdy. 

Andreı Ferapontov «Aqtóbe», «Ordabasy», «Qaırat», belarýstik «Rýh» komandalarynyń bapkerlik shtabynda qyzmet atqarǵan. Qurama deńgeıinde de tájirıbesi jetkilikti. Búginde Qazaqstan jastar quramasynyń bas bapkeri mindetin atqarady.

Aıta ketsek, sońǵy úsh jylda qyzylordalyq klýbta bas bapker bolǵan Vıktor Kýmykovtyń kelisim sharty aıaqtalýyna baılanysty qyzmetinen ketti.

Ol qyzylordalyq klýbta 2023 jyldan beri jumys jasap keledi. 2023 jyly - 6, 2024 jyly - 8, 2025- jyly -11 oryn aldy. Odan buryn Vıktor Kýmykov atalǵan komandada 2003-2004 jyldarda qyzmet atqardy.

Sondaı-aq ol «Spartak» Nalchık (Reseı), «Elimaı» (Qazaqstan), «Mashal» (Ózbekstan), «Nasaf» (Ózbekstan), «Shahter» (Qazaqstan), «Ordabasy» (Qazaqstan), «Almalyk» (Ózbekstan), «Atyraý» (Qazaqstan) komandalarynda bas jattyqtyrýshy bolǵan. 

Eske salsaq, bıyl «Aqtóbe» fýtbol klýbynyń ıesi anyqtaldy.